Thellohet gropa, 80 milionë dollarë detyrime të prapambetura

Në gjashtë muajt e parë të vitit u krijuan edhe 26 milionë dollarë detyrime Largimet e padrejta nga puna, borxhi 17 milionë dollarë

Institucionet shtetërore kanë akumuluar një borxh prej 80 milionë dollarësh. Vetëm në gjashtë muajt e parë të vitit borxhi i krijuar rishtas është 26 milionë dollarë. Pjesa më e madhe e detyrimeve janë akumuluar në infrastrukturën rrugore dhe mospagesa e vendimeve të gjykatave për largimet e padrejta nga puna. Në zërin detyrime për vendime gjyqësore borxhi arrin në rreth 17 milionë dollarë. Detyrimet e prapambetura dhe të krijuara rishtazi janë publikuar nga Ministria e Financave dhe Ekonomisë dhe përkasin gjashtëmujorit të parë të këtij viti. Sipas të dhënave nga Ministria e Financave dhe Ekonomisë në institucionet buxhetore rezulton se sektori që ka akumuluar më shumë detyrime, është ai i rrugëve, ku vetëm për shtrime, asfaltime dhe mirëmbajtje janë 10 milionë dollarë detyrime të prapambetura. Ndërkohë që në total Ministria e Infrastrukturës dhe Energjisë ka një borxh të akumuluar ndaj bizneseve në vlerën e 44 milionë dollarëve. Ndërsa Ministria e Mbrojtjes ka akumuluar një borxh prej 9 milionë dollarësh për shpenzimet e emergjencave civile. Peshë të konsiderueshme për buxhetin për shkak të vendime gjyqësore për të larguarit nga puna është Ministria e Brendshme. Vetëm Inspektorati Kombëtar i Territorit duhet të paguajë një faturë në vlerën e 3 milionë dollarëve, ndërsa 2.9 milionë të tjera janë pagesa që duhet të bënte Gjendja

Civile për shpërblimin e lindjeve. Shumica e detyrimeve të institucioneve shtetërore lidhen me vendimet gjyqësore për të larguarit nga puna, të cilat kapin një total prej 17 milionë dollarësh. Edhe Ministria e Arsimit, Sportit dhe Rinisë raporton se ka një total prej 21 milionë dollarë detyrime të akumuluara. Ministria e Drejtësisë raporton se totali i detyrimeve të prapambetura për deri në qershor 2019 arrin në vlerën 11.6 milionë dollarë. Ndërkohë për periudhën prill- qershor 2019, kjo ministri ka krijuar detyrime të reja në vlerën 5 milionë dollarë. Pjesa më e madhe e detyrimeve i referohet kryesisht zërit të investimeve. Ndërkohë Ministria e Shëndetësisë dhe Mbrojtjes Sociale ka një stok detyrimesh të prapambetura prej rreth 32 milion dollarësh, progresiv deri në Qershor 2019. Për tremujorin prillqershor 2019, ky institucion ka krijuar detyrime të reja në vlerën 9 milionë dollarë. Ministria e Brendshme regjistron një stok detyrimesh deri në qershor 2019, i cili është në vlerën 6 milionë dollarësh. Detyrimet e reja të krijuara në periudhën prill- qershor 2019 janë në vlerën 9 milionë lekë, ndërkohë që stoku i mbartur është 6 milionë dollarësh. Ndërkohë Ministria e Financave dhe Ekonomisë ka një total stoku detyrimesh të akumuluar deri në qershor 2019, i cili është 3.9 milionë dollarë, ku 3.2 milionë dollarë i dedikohen detyrimeve për vendime gjyqësore për ish- punonjës të Drejtorisë së Përgjithshme të Tatimeve.