Financat, borxhet e prapambetura kanë shkuar në 340 mln euro
Denaj publikon strategjinë e rishikuar të financave publike 2019- 2022 FMN dhe BB: Kujdes me PPP- të dhe detyrimet e prapambetura
Detyrimet e prapam betura arrijnë në 340 milionë euro dhe qeveria do të vazhdojë shlyerjen e borxheve të prapambetura. Prioritet do të ketë pagesave për detyrime nga tatimi mbi vlerën e shtuar pavarësisht ecurisë së të ardhurave në buxhet. "Shqetësimi i borxheve të prapambetura është i të gjithëve, edhe i Ministrisë së Financave. Ne këtë vit kemi projektuar në buxhet 19 miliardë lekë dhe kjo shifër nuk do të preket nga ecuria e të ardhurave. Për vitin tjetër do ta shihni që do të shlyejmë edhe më shumë detyrime të prapambetura",- tha dje ministrja e Financave dhe Ekonomisë pasi bëri publike strategjinë e rishikuar të financave publike 2019- 2022, e cila ka në fokus rritjen e llogaridhënies dhe transparencës në planifikimin dhe shpenzimin e fondeve publike. Të pranishëm gjatë prezantimit të strategjisë, institucionet ndërkombëtare si Bashkimi Europian, Fondi Monetar Ndërkombëtar dhe Banka Botërore, kanë vënë theksin tek rëndësia që duhet t'i kushtetohet detyrimeve të prapambetura dhe menaxhimit te riskut që vjen nga PPP- të.
MINISTRIA
Ministrja e Financave dhe e Ekonomisë, Anila Denaj, publikoi dje Strategjinë e Rishikuar të Menaxhimit të Financave Publike 2019- 2022, në një aktivitet të organizuar nga MFE me mbështetjen e Projektit të AT- MFP financuar nga BE, ku të pranishëm ishin përfaqësues të Delegacionit të BE në Tiranë, përfaqësues të ministrive të linjës dhe institucioneve ndërkombëtare që mbështetën hartimin e strategjisë dhe zbatimin e reformës për financat publike. Puna disa mujore për rishikimin strategjisë, e cila vjen me një strukturë të re, ka nisur me procesin e vlerësimit afatmesëm të Strategjisë së Menaxhimit të Financave Publike 2014- 2020, për të vlerësuar ecurinë e reformës gjatë periudhës qershor 2015- 2018. Ajo siguron një qasje të harmonizuar të kuadrit strategjik dhe mundëson monitorimin bazuar tregues të matshëm, në bazë të arritjeve të rezultateve. Ministrja e Financave dhe Ekonomisë, Anila Denaj, pasi falënderoi të gjithë ata që kontribuan në rishikimin e Strategjisë, shprehu bindjen se Strategjia qëndron në themel të një reforme po aq të rëndësishme për Shqipërinë, siç është ajo e drejtësisë. "Sepse kjo është një reformë për një ekonomi më të fortë dhe shërbime të përmirësuara për qytetarët. Ajo rrit përgjegjshmërinë, transparencën, eficiencën dhe disiplinën fiskale në planifikimin dhe shpenzimin e fondeve publike. Kjo strategji synon të vendosë standarde të reja që kontribuojnë në një proces sa më transparent të planifikimit dhe të shpenzimit të fondeve publike",- u shpreh Denaj. Përmes kësaj strategjie, qeveria shqiptare dhe Ministria e Financave dhe Ekonomisë mundëson: buxhetimin gjinor, si një përpjekje konkrete për të rritur mundësitë e barabarta mes burrave dhe grave në zhvillimin e vendit dhe transformimin shoqëror; i mundëson pushtetit vendor ofrimin e shërbimeve më të mira për qytetarët dhe në mënyrë më transparente; u mundëson qytetarëve të thonë fjalën e tyre për planifikimin dhe shpenzimin e parave publike. Ministrja theksoi gjatë fjalës së saj se Strategjia, e cila mbështetet në shtatë objektiva specifikë, Plani i Veprimit dhe Rezultatet e Matshme, do të jenë një udhërrëfyes për: Reduktimin e borxhit publik; shlyerjen dhe parandalimin e detyrimeve të prapambetura; mobilizimin e vazhdueshëm për mbledhjen e të ardhurave tatimore dhe doganore; sigurimin e një lidhjeje më të mirë të planeve strategjikë me Programin e Buxhetit Afatmesëm; një angazhim më të strukturuar dhe në kohë me qytetarët, me organizatat e shoqërisë civile dhe me akademinë në planifikimin, monitorimin dhe raportimin e buxhetit; rritje e përpjekjeve për të përmirësuar shkallën e zbatimit të rekomandimeve dhe gjetjeve të Kontrollit të Lartë të Shtetit.
BE
Përfaqësuesi i Delegacionit të Bashkimit Europian, Mario Mariani, vlerësoi progresin e bërë në rishikimin e Strategjisë sa i përket forcimit të elementëve të llogaridhënies, transparencës dhe eficiencës. Reforma në menaxhimin e financave publike, theksoi Mariani, duhet parë e lidhur ngushtësisht edhe me reformën në administratën publike, përmes së cilës synohet institucione të forta dhe shërbime më të mira për qytetarët shqiptarë.
FMN- BB
Përfaqësuesja e FMN- së, Linda Spahia, theksoi rëndësinë e menaxhimit efektiv të financave publike, në mënyrë që politikat fiskale të japin efektet e tyre në praktikë. Nga ana e saj, ekspertja e Bankës Botërore, Hilda Shijaku, u shpreh se Banka Botërore mbetet një partner në reformën e menaxhimit të financave publike dhe vuri theksin në disa prej sfidave që duhet të përballohen nga institucionet shqiptare.
AMBASADA
Përfaqësuesi i SECO, ambasada zvicerane, Patrik Meier, vlerësoi progresin e bërë nga Shqipëria sa i përket konsolidimit fiskal dhe përmirësimin e financave publike, ku rezultate të prekshme vërehen në uljen e borxhit apo zbatimin dhe raportimin e buxhetit. Strategjia e rishikuar e financave publike, tha Meier, tregon angazhimin e qeverisë për vazhdimin e konsolidimit fiskal.