"Kajmaku", Basha: Qeveri kujdestare, që do të garantojë votën
Basha: Skemë për t'i dorëzuar pushtetin krimit
Lulzim Basha e akuzoi dje Edi Ramën se ras ti i kryebashkiakut të Vorës Agim Kajmaku është i mirëmenduar dhe pjesë e një skeme të kryeministrit për t'ia dorëzuar pushtetin krimit. Ndaj në një dalje për mediat kryetari demokrat Lulzim Basha u shpreh për një skemë të mirëmenduar të PS- së. Basha deklaroi se kryetari i shkarkuar i Bashkisë së Vorës, Agim Kajmaku është fytyra e Edi Ramës. "Agim Kajmaku është fytyra e Edi Ramës. Është një poshtërim për PS në radhë të parë, nga e cila nuk nxjerr dot kandidatë të padënuar, të painkriminuar, të pazhytur dhe të pakorruptuar, por nxjerr llumin e llumit. Por është një poshtërim edhe për qytetarët shqiptarë, që shkëlqejnë kudo në botë, por në vendin e tyre qeverisen nga kriminelë e trafikantë që e kanë vendin në burg",- theksoi z. Basha. KQZ vendosi me votë unanime shkarkimin e Kajmakut me kërkesë të Prokurorisë së Përgjithshme, sipas të cilës kryebashkiaku i zgjedhur në 30 qershor është subjekt i ligjit të dekriminalizmit pasi në formularin e vetëdeklarimit nuk ka përmendur ndalimin në Greqi në vitin 2003 me para të falsifikuara. Basha shprehu bindjen se tashmë është e provuar që Edi Rama nuk vendos dot pa krimin dhe se e gjitha ka qenë një skemë e mirëmenduar prej tij për të ardhur në pushtet me krimin. Lideri Basha theksoi se për këdo që ka pasur dyshime se 2013, 2015, 2017 apo 2019 janë rastësi. "PS nuk vendos dot kandidatë të painkriminuar, të pakorruptuar. Ky është një poshtërim për të gjithë shqiptarët të cilët shkëlqejnë kudo në botë, por në vendin e tyre qeverisen nga kriminelë, trafikantë e hajdutë. Për këdo që ka patur dyshime apo ka menduar se 2013, 2015, 2016, 2017, 2019 janë rastësi, tani i ka të gjitha. Ka qenë një skemë e mirëmenduar e Edi Ramës për t'i dorëzuar pushtetin krimit, prandaj qeveris me krimin dhe e mban pushtetin me krimin",- theksoi z. Basha. Lideri i opozitës kërkoi edhe në reagimin e djeshëm zgjedhje të parakohshme. Sipas tij e vetmja zgjidhje është t'i kthehet pushteti popullit dhe mbajtja e zgjedhjeve të parakohshme parlamentare me një qeveri kujdestare që të garantojë votën. Sipas tij kriza politike do të marrë fund nga zgjedhjet e parakohshme. Ai është i bindur se shqiptarët do ta largojnë këtë qeveri dhe të zgjedhin një qeveri që do të rikthejë shpresën. "Zgjidhja e vetme është që t'ia kthejmë qeverisjen shqiptarëve, t'ia kthejmë parlamentin shqiptarëve me zgjedhje të parakohshme parlamentare me një qeveri kujdestare që do të garantojë votën e tyre",- u shpreh kryetari i opozitës Lulzim Basha.