Emërimet në Shkodër, Rama përplaset me Sterkajn: Keni çuar nga 7 lista
"Tani do merrem vetë, meqë ju nuk i dhatë drejtim"
Gati dy javë më parë kryeministri Edi Rama u kërkoi deputetëve të qarkut të Shkodrës që të linin mënjanë qejfmbetjet mes tyre dhe t'u jepnin zgjidhje problematikave të krijuara qoftë me procesin e riorganizimit të Partisë Socialiste në këtë qytet, ashtu edhe për emërimet e drejtorëve dhe punësimet në administratë. Por pavarësisht kësaj, situata nuk ka ndryshuar dhe kjo u reflektua edhe në mbledhjen e fundit të drejtuesve socialistë të Shkodrës, ku nuk munguan debatet e forta dhe akuzat ndaj deputetëve të caktuar, si dhe në takimin e djeshëm Këshillit Koordinues të Rajonit të Veriut që zhvilloi kryeministri Edi Rama me deputetët dhe të zgjedhurit vendorë të tri qarqeve që e përbëjnë atë. Mbledhja e djeshme është shoqëruar sërish me debate dhe shkak janë bërë pikërisht procesi i emërimeve dhe punësimeve në drejtoritë kryesore të Shkodrës. Protagonist është bërë Paulin Sterkaj, i cili i ka kujtuar Ramës se pavarësisht ndërhyrjes së tij pak javë më parë, situata vijon të mbetet e njëjtë dhe se emërimi i drejtorëve është kthyer në një tender politik mes të gjithë deputetëve. Burimet nga ky takim i mbajtur në selinë rozë në kryeqytet bëjnë me dije se ligjvënësi i Shkodrës i është drejtuar kryeministrit duke i thënë se vendimi për drejtorët ka marrë trajtat e një tenderi, ku secili dërgon emrat e tij. "Na thatë që ta zgjidhim vetë këtë gjë herën e shkuar, por kjo puna e emërimeve është kthyer si tender, ku secili çon emrat vet", - mësohet të jetë shprehur Sterkaj. Deklaratë e cila ka shkaktuar reagimin e kryeministrit Rama, i cili tha se sipas informacioneve që ka, janë 7 lista me emra për drejtorë për institucionet e Shkodrës. "Nuk e kemi bërë tender. Musai më ka thënë që i keni çuar nga 7 lista", - i është përgjigjur Rama Sterkajt. Më tej kryetari i PS- së u ka bërë të ditur të pranishmëve se për sa kohë nuk arritën që t'i sheshonin mosmarrëveshjet dhe qejfmbetjet personale për t'i dhënë një drejtim tjetër punëve në Shkodër, ai do ta marrë vetë këtë çështje në dorë dhe për t'i dhënë zgjidhjen e duhur. "Kam menduar që ju do ta zgjidhni këtë gjë. Tani do të merrem vetë. Meqë ju nuk i dhatë drejtim. Të hënën, mbledhje e posaçme vetëm me Shkodrën për këtë gjë", - mësohet të jetë shprehur Rama. Gjendja në degën e PS- së së Shkodrës është kaotike, pasi me vendim të kryesisë është bërë shkrirja e të gjitha strukturave drejtuese të kësaj force në këtë qytet. Për rrjedhojë mungon drejtuesi i degës së PS- së, ndërkohë që selia qendrore e partisë nuk ka caktuar ende një të dërguar politik, si dhe zgjedhjet e brendshme në këtë degë nuk janë zhvilluar. Tri ditë më parë, mbledhja në selinë e degës së PS- së Shkodër u shoqërua me debate të forta, për emërimin e drejtuesve në Bashkinë Shkodër. Socialistët e kryeqendrës së veriut kanë kundërshtuar edhe të dërguarit e kupolës drejtuese të PS- së, duke thënë se nuk mund të punohet pa mësuar se cili është drejtuesi i tyre politik. Gjithashtu, ata kanë kundërshtuar propozimet që vijnë nga Tirana dhe emërimet e personave që vijnë nga jashtë Shkodrës. Por sikur të mos mjaftonin këto debate, Partia Socialiste në këtë qytet është edhe në një ngërç sa i përket drejtimit të Bashkisë. Në këtë qytet socialistët kanë marrë drejtimin e Këshillit Bashkiak, i cili nuk njihet nga kryetarja në detyrë e bashkisë, Voltana Ademi. Ndërkohë që vetë socialistët bënë përpjekje për ta larguar Ademin, por pa mundur të jepnin një zgjidhje për mënyrën se si duhet ta zëvendësojnë atë në kushtet kur Presidenti i Republikës nuk pranon të dekretojë një datë për zgjedhje të pjesshme në këtë bashki. Kujtojmë se kriza e socialistëve në këtë bashki nisi me dorëheqjen e Valdrin Pjetrit si kryetar bashkie, pasi u faktua se kishte fshehur një dënim për një vepër të ndodhur në Itali.