Subjektet, më shumë se 50% me shkelje. Tatimet kontrollojnë 610 biznese për 10 ditë

Gjatë 10 ditëshit të fundit të muajit tetor administrata tatimore ushtroi 610 kontrolle në njësi të ndryshme të biznesit. Gjatë kontrolleve u gjetën më shumë se 355 subjekte ose më shumë se gjysma janë gjetur me shkelje. Sipas burimeve zyrtare nga inspektimet u gjetën 50 subjekte të paregjistruara në organet tatimore. Tatimet bëjnë të ditur se 80 tatimpagues të tjerë u penalizuan për shkeljen e mos lëshimit të kuponit tatimor ( rasti i parë), ndërsa 2 tatimpaguesve u janë bllokuar ambientet për 30 ditë kalendarike për mos lëshim kuponi tatimor ( hera e dytë). Sipas tatimeve 40 biznese janë penalizuar pasi janë konstatuar me punonjës të padeklaruar, nga të cilët 34 subjekte janë të përgjegjësisë tatimore "biznes i vogël" dhe 6 subjekte janë të përgjegjësisë tatimore "biznes i madh". Ndërkohë 11 tatimpagues janë konstatuar se nuk kanë pasur të instaluar pajisjet fiskale dhe 13 tjerë nuk i mbanin pajisjet fiskale në gjendje pune. Mësohet se 63 tatimpagues janë konstatuar se dispononin mallra pa dokumentacion tatimor. Drejtoria e përgjithshme e Tatimeve njofton se strukturat e Monitorimit në Terren vijojnë kontrollet në të gjithë vendin. Pak ditë më parë Drejtoresha e Përgjithshme e Tatimeve, Delina Ibrahimaj tha se përgjatë pjesës së mbetur të vitit, deklarimi i punonjësve në skemën e sigurimeve shoqërore dhe deklarimi i pagës reale të tyre do të jetë në fokus të Planit Operacional kundër informalitetit për pjesën e mbetur të vitit 2019. Deri në fund të muajit dhjetor do të inspektohen për deklarimin e punonjësve, subjektet e evidentuar nga analiza e riskut për deklarimin e punonjësve, deklarimin e pagave dhe përmbushjen e detyrimeve ndaj organeve tatimore.