Dvorani i përgjigjet Metës: Duhej të zgjidhje 1 nga 3 emrat e parë të listës
' Ushtar partie', KED: Deklaratat, aspak dinjitoze
Kreu
i Këshillit të Emërimeve në Drejtësi, Ardian Dvo rani iu përgjigj dje akuzave të forta që bëri ndaj tij Presidenti Meta. Kreu i shtetit akuzoi Dvoranin se është sjellë si militant partie në lidhje me praktiken institucionale mbi propozimin e emrave kandidatë për në Gjykatën Kushtetuese. Mirëpo kreu i KED, në një reagim zyrtar për mediat i konsideroi këto akuza të Metës, si të pavërteta dhe tërësisht të papërshtatshme. "Duke i vlerësuar jo vetëm si të pavërteta thëniet, por edhe si tërësisht të papërshtatshme në aspektin institucional dhe etik, jo vetëm qëndrimin, por edhe sjelljen dhe gjuhën e përdorur nga Presidenti i Republikës, në raport me vendin, dinjitetin dhe prestigjin që i cakton Kushtetuta e Republikës së Shqipërisë. Duke respektuar të drejtën dhe detyrimin që buron nga qenia funksionar kushtetues, në përbërje dhe drejtim të një organi kushtetues të pavarur, sipas të cilit, çdo organ kushtetues dhe çdo funksionar kushtetues është interpretuesi dhe zbatuesi i drejtpërdrejtë i Kushtetutës dhe ligjit, në mënyrën të pavarur dhe të pandikuar nga qëndrimi i institucioneve të tjera, aq më tepër nga interesat e një natyre joinstitucionale", tha z. Dvorani. Ai saktësoi se KED, ka ezauruar të gjitha procedurat e verifikimit, vlerësimit dhe të renditjes së kandidatëve për të gjitha vendet vakante dhe të gjitha organet e tjera janë të detyruar t'i përmbahen listave të publikuara për sa i takon renditjes dhe përbërjes së tyre, në këtë rast të dërguara Presidentit dhe Kuvendit.