Tërmeti rrënoi Durrësin, 300 persona shpërngulen në hotelet e qytetit
Kaos në stadiumin "Niko Dovana", duhen më shumë çadra, ndihmat po vidhen
Tërmeti "apokaliptik" i mëngjesit të së mar tës dhe lëkundjet pasuese në seri e kanë kthyer në rrënojë qytetin e Durrësit dhe rrethinat e tij. Sipas raportimeve, mësohet se 300 persona janë shpërngulur nëpër hotele në qytetin bregdetar, ku janë vendosur në dispozicion 1500 shtretër. Ndërkaq, raportohet se do të ketë shtretër të shtruar edhe në stadiumin e qytetit në "Niko Dovana". Po kështu janë ngritur kampe edhe në Manëz, Ishëm, Sukth e Katund i Ri, rreth 181 çadra në total, ku janë strehuar rreth 1450 banorë. Ndërkaq, sipas "Ora News", situata në stadiumin "Niko Dovana" në Durrës vijon të jetë tejet e çorganizuar. Janë rreth 3000 banorë që kanë gjetur strehë në çadrat e ngritura në stadium. Nata e së martës ka kaluar në kushte shumë të vështira për disa prej tyre. Ka mungesë çadrash, por edhe abuzime në mënyrën e shpërndarjes së ushqimeve. "Duhet të ketë verifikim të qytetarëve që janë banorë të këtij kampi, një hyn dhe një del. Vinë marrin ndihma dhe largohen. Autoritetet janë të shqetësuara. Pata komunikim me disa biznesmenë, më thanë se po vijmë të sjellim ndihma, por kemi dëgjuar që po vidhen. Ka pasur një tërheqje nga ana e këtyre biznesmenëve, është për të ardhur keq. Një abuzim i panevojshëm. Nëse hyjnë njerëz të paverifikuar në kamp, është e pamundur për të mbajtur në kontroll këtë situatë kaotike. Duhet të hyjnë me karta identiteti ata që janë banorë të kampit. Në mëngjes pashë sesi njerëzit vinin dhe merrnin ndihma me karroca dhe largoheshin në shtëpitë e tyre", raportoi Leonidha Musaj.
Abuzimet janë si nga ana e banorëve që po tentojnë të përfitojnë të mira materiale, persona të ndryshëm që sjellin donacione, por edhe nga vetë personat që shpërndajnë këto ndihma. "Ndihmat po vidhen masivisht nga banorët, por edhe ata që po merren me shpërndarjen e tyre. Ka forca të shumta vullnetare që po kontribuojnë, por nuk ka një organizim si duhet. I takon Bashkisë së Durrësit të merret me organizimin", raportoi gazetari i RTV "Ora News". Autoritetet janë të dorëzuara deri diku, kryebashkiakja Sako në një komunikim që pati me gazetarin Leonidha Musaj është shprehur se është e pamundur të bëjnë më shumë se kaq në të tilla rrethana. "Jemi shumë të frikësuar. Banesa është dëmtuar, nuk kemi besë të rrimë aty dhe ndaj kemi ardhur. Këtu do të rrimë, se nuk kemi ku të shkojmë", tha një banore.
"Ftohtë është, me fëmijë të vegjël. Jemi 6 persona, çadër nuk kemi, as enë, asgjë. Nuk vinë te ne as për ushqime, as për ndihmë. Po rrimë në këmbë. Nuk po na sjellin çadër. Kemi frikë të rrimë në shtëpi, as për të marrë rroba. Fëmijët u torturuan, pa gjumë, kanë frikë. Kërkojmë strehim", u shpreh një banore tjetër.
NËNË E BIR, TË PËRQAFUAR
Nënë e bir, të cilët kanë humbur jetën pas tërmetit janë motra dhe nipi i Edison Konomit, ishdrejtor i doganave në Durrës. Nëna 47 vjeçe dhe djali 22 vjeç janë gjetur të përqafuar me njëri- tjetrin, ndërkohë që misioni për shpëtimin e tyre po vështirësohej për shkak se mbi ta është rrëzuar edhe një kolonë tek 6- katëshi në lagjen 18 në Durrës.