Tragjedia e familjes Cara, shuhen 8 anëtarë, shpëton kryefamiljari
Dy fëmijët japin frymën e fundit pranë nënës poshtë rrënojave
Tragjik ka qënë fundi për familjen Cara në Thumanë ku 8 persona kanë humbur jetën nga tërmeti i fuqishëm me magnitudë 6.3 të shkallës rihter. I vetmi i shpëtuar dhe i mbijetuar i kësaj tragjedie është Alberti, kryefamiljari i Cara- jve. Ndërkohë Sulë Cara i afërm i familjes tha për News 24 se ka pasur dy familje në pallatin e shembur, njëra në katin e parë dhe tjetra në të gjashtin. Ai shprehu mes lotësh dhimbjen e tij të madhe. “Tek kjo fatkeqësi, në pallatin që u shemb nga ai tërmet i tmerrshëm kam pasur 9 të afërm. Në katin e parë ka qenë nusja e xhaxhait vetë e treta me vajzën dhe mbesën, ndërsa në katin e gjashtë kemi pasur Albertin vet i gjashtë dhe e fejuara e djalit që kishte ardhur nga Korça për të takuar të fejuarin dhe prindërit e tij. Kishte ardhur para dy ditësh. Ka qenë një punë e jashtëzakonshme e njësive që kanë marrë pjesë në këto operacione, por ajo që më ka bërë më shumë përshtypje ka qenë solidariteti i komunitetit të Thumanës, i madh e i vogël, me një varfëri por me solidaritet. Po bëjmë qëndresë, më e vështira do jetë nesër për ceremoninë mortore kur para njerëzve të dashur do jenë jo pak por 8 arkivolë. Dhimbja është jo vetëm për familjen Cara, por të gjithë prekurit. Ngushëllime të sinqerta për të gjithë ata që kanë humbur njerëzit e dashur”,- tha ai. Mes viktimave është edhe Erisa Cara, vajza e Albertit. Miq të ngushtë të saj shprehen se nuk e besojnë dot që shoqja e tyre ka ndërruar jetë. Gjithashtu, shtojnë se Erisa dhe vëllai i saj, Hasani, u gjetën pranën nënës së tyre, Fatmirës, të tre pa frymë. Ata e përshkruajnë Erisën si një vajzë të sjellshme, e cila punonte punë të ndershme gjatë kohës që studionte. E reja bënte shumë orë punë ekstra dhe në disa raste, edhe dy punë, gjithçka vetëm e vetëm për të ndihmuar familjen e saj, e cila ishte në gjendje jo të mirë ekonomike. “Nuk arrij ta kapërdij dot. Një vajzë kaq energjiike që kam pasur kolege pune nuk jeton më, e kam të pamundur të mos kujtoj sakrificën që ajo bënte ndërmjet rrugëve përdite për të punuar në Tiranë, jetuar në Thumanë dhe shkolluar njëkohësisht. Më dhemb shpirti që gjithë bisedat që bëra me të për të ardhmen tonë ajo nuk do mund ti realizojë. Erisa Cara u prefsh në paqe!”,- shprehet plot dhimbje kolegia e saj Elda.
DITËLINDJA E PAFESTUAR
Një tjetër pjesëtar që humbi jetën tragjikisht është edhe Hasan Cara, djaloshi i cili ditën e djeshme, në 27 nëntor, kishte ftuar shokët e miqtë e tij të festonte ditëlindjen e 18- të. Shokëve u kishte thënë një muaj më parë se do të mblidheshin dje për ditëlindjen e tij, por fati nuk ia mundësoi këtë gjë. Gjimnazisti 17- vjeçar jetonte në Thumanë, pikërisht në njërin nga pallatet e shembura, kurse gjimnazin e kryente në Fushë- Krujë. Ditën e djeshme, shokët e tij të klasës kishin kërkuar informacion mbi gjendjen shëndetësore të Canes, dhe i kishin blerë edhe tortën e ditëlindjes. Shoku i tij i ngushtë, Xhoni Gjokeja i dedikoi Hasanit ( Canes) edhe një mesazh të ndjerë. “Më kishe premtuar që sot do dilnim, nuk e mbajte fjalën vlla. Sot ( dje) do ishte dita më e bukur për ty, po fatkeqësisht u bë më e keqja për ne. S’e gëzove ditëlindjen e 18- të vëlla. Të pushtoftë shpirti në paqe vëllai im” thuhet në mesazhin që shoqëron foton.