Gjendje e jashtëzakonshme në qarqet Durrës dhe Tiranë, ja masat që merren
Bizneset duhet të mbyllin aktivitetin dhe të vihen në shërbim të qeverisë 500 mijë lekë kompensim për çdo të vdekur nga fatkeqësia
SUBJEKTET
Në pikën 7 përcaktohet se subjektet private duhet të respektojnë procedurat dhe masat për evakuimin dhe strehimin e të evokuarve, të përfshihen në detyra të veçanta, në përputhje me përgatitjen, aftësitë dhe me nevojën për të ndihmuar në kapërcimin e gjendjes së fatkeqësisë natyrore.
Tërmeti katastrofik që goditi vendin tonë mëngjesin e 26 nëntorit dhe pasojat e rënda që ai ka krijuar në disa zona ka detyruar qeverinë që të shpallë dje për herë të parë afro 20 vitet e fundit gjendjen e jashtëzakonshme në qarqet Durrës dhe Tiranë. Vendimi u mor në një mbledhje të posaçme të Këshillit të Ministrave të drejtuar nga kryeministri Edi Rama, i cili theksoi se për shkak të situatës tepër të rëndë në këto dy qarqe do të zbatohet gjendja e jashtëzakonshme si një mundësi për të organizuar më mirë punën, por edhe për t'u siguruar banorëve të dëmtuar një trajtim më të mirë, si dhe për t'u dëmshpërblyer siç duhet për çdo dëm që kanë pësuar.
RAMA
Ai bëri të ditur se gjendja e jashtëzakonshme do të zgjasë për 30 ditë dhe se ajo njëherazi përveç detyrimeve që sjell për institucionet shtetërore, do të sjellë edhe një sërë detyrimesh dhe kufizime të lirive për qytetarët apo edhe subjektet e tjera private që funksionojnë në këto dy qarqe. "Shpallim gjendjen e jashtëzakonshme bazuar në Kushtetutë. Ashtu si Kushtetuta dhe legjislacioni shtjellojnë, duke nisur nga natyra dhe perimetri i situatës do të jetë gjendje e jashtëzakonshme për dy rajonet e prekura në mënyrë të drejtpërdrejtë, Tiranën dhe Durrësin. Por për ata që nuk e dinë, gjendja e jashtëzakonshme nuk është çështje thjesht financash, por e një sërë masave. E thash dje dhe e thotë edhe historia jonë. Pasi për çështjen financiare s'kemi lënë asgjë mangët. Nuk e di nëse janë të gatshëm ata që e predikonin gjendjen e jashtëzakonshme që t'u nënshtrohen këtyre masave. Gjendja e jashtëzakonshme për një periudhë 30- ditore ka hapësirat dhe detyrimet për ata që duhet ta qeverisin atë. Mbase nuk do u vijë për shtat atyre që e kanë predikuar, pasi ka qenë një temë me të cilën mund të bënin politikë, pasi Shqipëria ishte në lot", - tha Rama.
VENDIMI
Sipas vendimit të qeverisë, në 10 pikat e tij përcaktohet në mënyrë të detajuar mënyra dhe masat se si do të funksionojë gjendja e jas
htëzakonshme. Kështu, në bazë të këtij vendimi, krijohet Komiteti Ndërministror i Emergjencave Civile ( KNEC), si organi më i lartë për koordinimin dhe bashkërendimin e veprimeve të institucioneve shtetërore dhe të subjekteve private, si dhe të burimeve financiare e materiale për përballimin
e fatkeqësisë natyrore. KNEC- ja kryesohet nga kryeministri dhe në përbërje të saj si anëtarë ka disa ministra si dhe drejtorin e Policisë së Shtetit, shefin e Shtabit të Përgjithshëm të Ushtrisë, prefektët e këtyre dy qarqeve, por ku mungojnë kryebashkiakët e zonave që janë prekur.
Ndërkohë që veç detyrimeve dhe masave që duhet të marrin institucionet shtetërore, kjo VKM përcakton edhe detyrimet që kanë subjektet apo bizneset private si dhe qytetarët. Më konkretisht, në pikën 7 përcaktohet se subjektet private duhet të respektojnë procedurat dhe masat për evakuimin dhe strehimin e të evokuarve, të përfshihen në detyra të veçanta, në përputhje me përgatitjen, aftësitë dhe me nevojën për të ndihmuar në kapërcimin e gjendjes së fatkeqësisë natyrore. Gjithashtu, ato detyrohen të mbyllin përkohësisht veprimtaritë e tyre si dhe të kryejnë shërbime të ndryshme në funksion të përballimit të fatkeqësive, apo dhe të prodhojnë artikuj të emergjencës, për të cilat do të kompensohen nga buxheti i shtetit sipas marrëveshjeve. Një pikë e veçantë është edhe ajo që detyron kompaninë koncesionare të Rrugës së Kombit që të mos vjelë tarifat e kalimit rrugor për mjetet e angazhuara në përballimin e gjendjes së fatkeqësisë natyrore. Ndërkohë që në pikën 8 të këtij vendimi përcaktohet se për procedurat, afatet dhe strukturat shtetërore përgjegjëse për vlerësimin e dëmeve do të zbatohen rregullat e përcaktuara në vendimin nr. 329, datë 16.5.2012 të Këshillit të Ministrave. Kjo VKM ndër të tjera përcakton se, "masa e ndihmës financiare që Këshilli i Ministrave ose Ministria e Brendshme akordon në rastin e humbjes së jetës së anëtarëve të familjes si pasojë e fatkeqësisë është 500 000 ( pesëqind mijë) lekë për çdo person të vdekur".