Bilanci më i fundit pas tërmetit: 6055 banesa të dëmtuara rëndë në 5 qarqe
Voda: 1183 shtëpi të shembura, 83 ekspertë vlerësimi për dëmet
Dhjetë ditë pas tërmetit shkatërrimtar numërohen plot 1183 shtëpi të shembura, 5497 të dëmtuara rëndë si dhe 558 pallate të dëmtuara rëndë për qarqet Durrës, Tiranë, Lezhë, Kukës dhe Dibër. Të dhënat janë bërë me dije ditën e djeshme nga zv. ministrja e Brendshme, Rovena Voda gjatë prezantimit të bilancit të datës 5 dhjetor 2019. "Për sa i përket bilancit paraprak të inspektimeve të dhënat janë si në vijim: Bashkia Durrës 1267 objekte të inspektuara, ku 406 prej tyre janë të pabanueshme, ndërsa 70 objekte janë për tu prishur. Bashkia Krujë ka 2185 objekte të inspektuara ku 748 janë të pabanueshme dhe 8 janë për t'u prishur. Ndërkohë në qytetin e Krujës po bëhet edhe studimi gjeologjik i kalasë si dhe ka përfunduar inspektimi i të gjitha godinave publike. Bashkia Shijak ka një numër objektesh të inspektuara prej 1497 ku prej të cilave 817 janë deklaruar të pabanueshme, ndërsa 285 duhen prishur. Në rang qarku kemi të inspektuara 4949 objekte",- theksoi Voda në fjalën e saj. Gjithashtu, vijon me rigorozitet monitorimi i cilësisë së furnizimit me ujë të pijshëm në zonat e prekura dhe njësitë e akomodimit.
EKSPERTËT NË TERREN
"Lidhur me ekipet për vlerësimin e dëmeve me ngritjen e njësisë së koordinimit për vlerësimin e dëmeve po iu përcjellim një pasqyrë të vendeve që kanë dërguar ekipe të vlerësimit me ekspertë. Numri i përgjithshëm i ekspertëve deri tani është 83; përkatësisht Franca me 4 ekspertë, Zvicra me 2; Italia me 8 ekspertë, Greqia me 16 ekspertë, Turqia 8, Maqedonia e Veriut me 16 ekspertë, SHBA me 2 ekspertë, Kosova 20, dhe Izraeli me 7 ekspertë. Ndërkohë dy vende të tjera të cilat pritet të dërgojnë ekipe të vlerësimit me ekspertë janë Rumania dhe Hungaria",tha Voda. Më tej ajo shtoi se ekipet shqiptare përbëhen nga Instituti i Ndërtimit, inxhinierët e Bashkisë Durrës, Fondi i Zhvillimit dhe Departamenti i Rrugëve të cilët janë ndarë në ekipe ne 11 njësitë administrative
Durrës. Inxhinierët ndërkombëtarë janë caktuar për të lehtësuar punën e këtyre ekipeve. Lidhur me punën në terren, në të gjithë qarkun Durrës, nga data 29.11.2019 deri më 5.12.2019 me shembjen sot ( dje) të një objekti në
Shkozet janë shembur 28 objekte në total; 10 në Thumanë dhe 18 objekte në Bashkinë Durrës.
QENDRA DISPEÇER
Deri në orën 17.30 të ditës së djeshme, numri i thirrjeve të përpunuara nga gjashtë operatorët në dispozicion të qytetarëve për të tre numrat e gjelbër: 0694114100; 0694114101 dhe 0694114040 ka qenë 440 në total. Përkatësisht ka patur 198 thirrje për ndihmë nga Tirana; 204 nga Durrësi; 36 nga Lezha; 1 nga Elbasani dhe po 1 nga Shkodra. Sikurse edhe gjatë dy ditëve të fundit, shumica dërrmuese prej 385 thirrjesh kanë qenë për verifikim dëmesh në banesë.
Puna vullnetare dhe siguria
Zv. ministrja ka bërë me dije se lidhur me vullnetarët individë, që në 30 nëntor 2019 u vendos në dispozicion në faqen e- albania një seksion i dedikuar plotësimit të dy formularëve për regjistrimin si individë apo OJF vullnetare për të dhënë kontribut në zgjidhjen e situatave problematike në zonat e prekura nga tërmeti i 26 nëntorit 2019- të. Deri më tani kanë mbërritur 336 aplikime individuale për vullnetarë. Ajo shtoi se për sa i përket sigurisë, strukturat e rendit dhe sigurisë publike në Qarkun e Durrësit të mbështetur nga efektivë të forcave të ndërhyrjes së shpejtë dhe efektivë rendi kanë bërë të mundur sigurimin e rendit dhe qetësisë në parametra normalë në qarkun e Durrësit. "Këto struktura janë angazhuar duke mbështetur të gjitha strukturat e tjera që po kryejnë veprime në terren së bashku me strukturat e inspektimit, strukturat e emergjencave civile, ruajtjen e vendeve të grumbullimit të ndihmave, ruajtjen e hoteleve ku janë akomoduar qytetarët, ruajtjen e objekteve të dëmtuara me rrezik të shtuar. Janë shtuar shërbimet policore në terren, është rritur prezenca dhe patrullimet duke monitoruar territorin në 24 orë, duke bërë të mundur parandalimin e veprave kriminale dhe të gjitha tendencave ndaj pronës, bizneseve dhe jetës së qytetarëve",- tha Voda.