"Katastrofë, gjendja e ndihmave", Berisha: Shtyrja e emergjencës thellon krizën
kryeministri Sali Berisha i cilëson krim shtetëror viktimat që shkaktoi tërmeti tragjik i 26 nëntorit. Kryeministrin Rama e akuzon si të papërgjegjshëm jo vetëm për shpërfilljen që i bëri paralajmërimit të bërë nga Presidenti Meta, por edhe menaxhimit të situatës. Më tej shkon në akuza kur flet edhe për korrupsion. "Ekipi i ndihmës nuk kishtë as dorëza për të hequr rrënojat, në një kohë kur të gjitha ndodheshin në depo të sjella nga Banka Botërore që në kohën e qeverisë së mëparshme dhe më vonë. Gjithçka ekzistonte, por nuk ekzistonte përgjegjësia njerëzore për t'i dalë zot situatës së krijuar. Nuk kishte qen me nuhatje molekulare, sepse Ardi Veliu paçka se taksapaguesit i jepnin 1 milion euro për shkollën e qenve, kishte vendosur t'i eksportonin nga Italia dhe katër prej qenve që solli nuk kishin nuhatje, pra i hëngri korrupsioni", tha z. Berisha për TV "Klan". Tallje e cilëson shpalljen e gjendjes së fatkeqësisë natyrore kur flet për mungesën e fondit të rezervës prej 1.4 miliardë lekësh, që sipas tij nuk është vënë në dispozicion nga qeveria për të prekurit nga tërmeti. Akuza ngriti edhe për skemën e dëmshpërblimit dhe rivlerësimit të banesave të dëmtuara. "1 milion lekë për familje, kanë qenë 8, 9 apo 1 viktimë, ky ka përdorur formën që përdor policia me falsitet në raste krimi. Mund të jenë mbi 100 ose 120 mijë objekte të dëmtuara që kanë nevojë për vlerësim, jo për t'u shembur, deri sot nuk është vlerësuar as 1/ 10, sepse për t'i vlerësuar duhet t'i kontraktosh, por duhet të paguash, do u japësh dietën, naftën. Katastrofë është gjendja e ndihmave". Shtyrjen me tre muaj të fatkeqësisë natyrore e sheh si thellim të katastrofës. "Ka vetëm përpjekje demoniake për të shpëtuar imazhin e tij të nxirë, përgjegjësinë e tij kriminale për këtë situatë", tha z. Berisha.