Lejuan pushtimin e tokave në bregdetin e Velipojës, arrestohen 3 punonjës të Zonave të Mbrojtura

Operacioni "Bregdet i Pastër", procedohen edhe 7 të tjerë

SHKODËR - Tre punonjës të Administratës së Zonave të Mbrojtura janë arrestuar nga policia e Shkodrës për "Shpërdorim detyre", ndërsa janë proceduar edhe 7 të tjerë për "pushtim toke" në mënyrë të paligjshme. Mësohet se personat e vënë në pranga janë Refik Zagani, Vesel Tusha dhe Palë Keçi. Pas kontrolleve të bëra në terren, policia konstatoi një sërë shkeljesh si gërmime, shpyllëzime toke, rrethime me gardh të hapësirave jashtë çdo të drejte ligjore. "Në vijim të punës për parandalimin, evidentimin dhe goditjen e krimeve mjedisore, si edhe të shpërdorimit të detyrës, specialistët e Seksionit për Hetimin e Krimit Ekonomik- Financiar, në kuadër të operacionit policor ' Bregdet i pastër' bënë ndalimin për veprën penale ' Shpërdorim detyre' të shtetasve: R. Z., 57 vjeç, banues në Shkodër, me detyrë rojë mjedisore në Zonat e Mbrojtura; V. T., 56 vjeç, banues në Shkodër, me detyrë specialist në Zonat e Mbrojtura si dhe P. K., 65 vjeç, banues në Shkodër, me detyre rojë mjedisore në Zonat e Mbrojtura", thuhet ndër të tjera në njoftimin e policisë. Ndërsa sqarohet se janë proceduar në gjendje të lirë për veprën penale "Pushtimit toke" shtetasit Gj. P., 64 vjeç, E. L., 35 vjeç, L. K., 66 vjeç, Gj. M., 58 vjeç, Gj. L., 72 vjeç, M. K., 61 vjeç dhe A. P., 47 vjeç, të gjithë banues në Shkodër.

Në zbatim të një plani masash të përbashkëta mes Drejtorisë Vendore të Policisë Shkodër dhe Administratës së Zonave të Mbrojtura, në vijim edhe të operacionit mbarëkombëtar kundër informalitetit janë ushtruar kontrolle në Zona të Mbrojtura në qarkun Shkodër. Si rezultat i kontrolleve në Velipojë janë konstatuar një sërë shkeljesh si gërmime, shpyllëzime, rrethime me gardh me rrjetë dhe me shtylla betoni etj. Sektori i Monitorimit, ku bëjnë pjesë specialistët dhe rojet mjedisore ka për detyrë parandalimin, zbulimin dhe luftimin e dëmtimit, pushtimit, shpërdorimit, tjetërsimit, shkretëtirëzimit a degradimit të natyrës, të pyjeve e të tokës pyjore, të cenimit nga ndërhyrjet e pakontrolluara në mjedisin natyror e ujor të zonës së mbrojtur. Materialet procedurale i kaluan Prokurorisë pranë Gjykatës së Shkallës së Parë Shkodër.