Kalonin klandestinë për 3 mijë euro, arrestohen 2 punonjës të portit, një polic nën hetim
DURRËS - Shërbimi i Kontrollit të Brendshëm dhe Ankesave në bashkëpunim me Prokurorinë e Rrethit Durrës ka proceduar një punonjës policie me detyrë kontrollor në port, ndërsa ka vënë në pranga edhe dy persona të tjerë, të cilët në bashkëpunim mes tyre arrinin të kalonin në kufi persona që kishin probleme në zonën Shengen. Sipas policisë, këta persona u merrnin qytetarëve një shumë prej 3 mijë eurosh. Mësohet se procedimi është ndjekur me metoda speciale të hetimit për veprën penale të "Korrupsionit pasiv të personave, që ushtrojnë funksione publike" dhe "Dhënie ndihme për kalim të paligjshëm", pasi shtetasit si dhe personat e tjerë të dyshuar, në bashkëpunim me njëri- tjetrin organizonin dhe kryenin trafikim, nëpërmjet Pikës së Kalimit Porti Durrës. Pas hetimit për një periudhë 3- mujore, në bashkëpunim me Prokurorinë e Rrethit Durrës, u finalizua operacioni "Sekseri", ku u arrestuan në flagrancë shtetasit: B. D., 44 vjeç, lindur e banues në Durrës, me detyrë punonjës në Zonën e Terminalit, i një shoqërie të kontraktuar nga Autoriteti Portual Durrës. Ky shtetas, në rolin e sekserit, organizonte dhe ndërmjetësonte me punonjës policie, duke krijuar kushte për kalim të paligjshëm të personave me probleme në zonën Shengen. Në cilësinë e provës materiale, në momentin e arrestimit iu sekuestrua vlera prej 1.300 euro, vlerë e përfituar nga kalimi i paligjshëm i shtetasit. Gjithashtu, u arrestua dhe T. D., 28 vjeç me banim në Durrës, me detyrë agjent doganor i një agjencie doganore private, në rolin e bashkëpunëtorit, i cili ndihmonte në gjetjen e klientëve për kalime të paligjshme. Iu kapën dhe sekuestruan 500 euro. Ndërsa, ndiqet në gjendje të lirë punonjësi i policisë V. C., 32 vjeç, me detyrë kontrollor në Stacionin e Policisë Kufitare Durrës. Hetimi vijon për zbulimin e plotë të ngjarjes dhe kapjen e personave të tjerë të dyshuar si të implikuar në këtë veprimtari kriminale.
NJOFTIM SHITJE ME ANKAND