SPAK, Bylykbashi: Shpresojmë të ketë impakt në goditjen e shitblerjes së votës
PD: Luftë krimit e korrupsionit në nivelet më të larta
PD-
ja përshëndeti dje fillimin e punës së SPAK- ut dhe mbështet funksionimin e pavarur të kësaj strukture. PD- ja shprehet se fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur. "Është koha që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t'i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar. Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta nga kriminelët me mbështetje qeveritare, tek politikanët dhe zyrtarët e lartë", - thuhet në deklaratë. PD- ja falënderon SHBA- të për ndihmën e dhënë deri më tani për bërjen funksionale të SPAK- ut dhe për gatishmërinë e treguar për të vijuar mbështetjen për funksionimin e pavarur të SPAK. Ishdeputeti Oerd Bylykbashi në "News 24" tha se opozita shpreson që ky institucion të ketë impakt edhe në shitblerjen e votës. "Me rëndësi sot është që SPAK- u nis punën, pistoletat që po nxjerrin tym për korrupsionin janë në qeveri. Shpresojmë të ketë impakt në goditjen e shitblerjes së votës. SPAK s'mund të ishte pa 10 prokurorë, siç e përcakton Kushtetuta. Keni prokuroren e përkohshme që iku në harresë, dje do të mund do të festonte përvjetorin e dytë. Në këtë vonesë trevjeçare nga ligji është më mirë të fillojmë punën dhe të shohim nëse SPAK- u do arrijë. Shpresa e madhe është që në bashkëpunim me ndërkombëtarët, kapja e SPAK- ut nuk do të ndodhë. Do ta shohim shpejt, ka mjaftueshëm ' pistoleta' me tym korrupsioni për t'u kapur SPAK. Nëse shpëton nga erozioni i detit të korrupsionit, do ishte lajm shumë i madh dhe shpresë," u shpreh Bylykbashi.