Kryemadhi, kritika Metës: Stabilokrat, i mundësoi Ramës të kapë drejtësinë
"Romana Vlahutin shkatërroi drejtësinë"
Monika
Kryemadhi deklaroi dje se LSI- ja është e gat shme të diskutojë rikthimin në Kuvend, në momentin që ngrihet Gjykata Kushtetuese. Ajo përmendi se në kushtet kur opozita ishte kthyer në fasadë dhe nuk kishte asnjë institucion që t'i vendoste fre mazhorancës, qëndrimi në Kuvend ishte vetëm për rroga. "Të më kthejë Gjykatën Kushtetuese Ilir Meta bashkë me Edi Ramën, dhe shikoje ti, shkoj apo nuk shkoj unë në parlament", tha Kryemadhi për "RTV Ora". Ajo kritikoi edhe qëndrimin e bashkëshortit të saj, Presidentit Ilir Meta, i cili sipas saj, me mosveprimin e tij lejoji që kryeministri të shkatërrojë drejtësinë. "Sigurisht që z. Meta është stabilokrat, është shtetar. I pëlqen që ne të ishim pjesë e institucioneve. Por edhe unë dua të jem pjesë e institucioneve, por dua të jem pjesë e institucioneve të pakapura. Mosndërhyrja e Ilir Metës, lënia dorë të lirë, modestia e tepruar e Ilir Metës solli që Edi Rama shkatërroi Gjykatën Kushtetuese, solli që Edi Rama me Romana Vlahutin shkatërruan drejtësinë, se e kemi harruar të gjithë Romana Vlahutinin", - theksoi kryetarja e LSI. Monika Kryemadhi tha se vendi ka shkuar në një krizë të thellë politike dhe ekonomike, ndërsa demokracia është në rrezik. Për këtë situatë, ajo fajësoi edhe faktorin ndërkombëtar, duke ngritur akuza të forta. "Jo faktor ndërkombëtar që paguhet në borderotë e Ramës, të krimit të organizuar, të qarqeve antishqiptare. Të gjitha këto do të fillojnë dhe do të konsolidohen. Të mos harrojmë që kanë filluar të kuptojnë se po përdoren paratë e BE- së dhe SHBA- ve për të kapur reformën në drejtësi", tha ajo. Kryetarja e LSI- së tha se ligjet e reformës në drejtësi u ndërtuan gabim falë edhe ndërkombëtarëve.