Premtimi i ministres: 70 mjekë specialistë do t'u shtohen spitaleve rajonale

Manastirliu, në spitalin e Lezhës: Hapet për herë të parë shërbimi i mamografisë "Procesi do të nisë nga muaji janar i 2020- ës"

Prej muajit janar të 2020ës, spitaleve rajonale në vend do t'u shtohen edhe 70 mjekë specialistë. Deklarata është bërë ditën e djeshme nga ministrja e Shëndetësisë dhe Mbrojtjes Sociale, Ogerta Manastirliu, gjatë vizitës së saj në spitalin e Lezhës, duke u fokusuar në investimin te burimet njerëzore. "Investimet në infrastrukturë janë të rëndësishme, por për ne është po aq i rëndësishëm investimi në burimet njerëzore. 130 mjekë specialistë u punësuan në spitalet rajonale gjatë vitit të fundit, ndërsa 70 mjekë të tjerë specialistë përfundojnë specializimin në dhjetor dhe do të punësohen në spitalet rajonale vitin e ardhshëm", tha Manastirliu. Ndërkohë, gjatë vizitës në spitalin e Lezhës, ministrja e Shëndetësisë vlerësoi punën e mjekëve të spitalit të Lezhës, që po përballojnë fluksin e pacientëve të shtruar që vijnë dhe nga qyteti i Laçit, për shkak të dëmtimit të spitalit si pasojë e tërmetit. Manastirliu garantoi se do të vijojnë investimet në vitin 2020, për të siguruar shërbim cilësor afër vendbanimit. Buxheti 2020 mbështet investimin për ndërtimin e maternitetit të ri të Lezhës, Beratit dhe Kukësit si dhe investimet për modernizimin e QSUT- së me ndërtimin e spitalit të ri të sëmundjeve të brendshme, rindërtimin dhe zgjerimin e pediatrisë së Tiranës dhe Durrësit dhe rindërtimin e 120 qendrave shëndetësore në vend.

MAMOGRAFIA

Dy muaj pas vizitës në spitalin e Lezhës, ku deklaroi se brenda vitit do të vendoset mamografia në këtë spital, ministrja Manastirliu u rikthye dje në Lezhë për të parë nga afër funksionimin e shërbimit të ri të mamografisë. "Siç e premtuam, vendosëm për herë të parë mamografinë në spitalin e Lezhës, me një teknologji të avancuar, që do u shërbejë grave të kësaj zone ta marrin shërbimin afër vendbanimit, pa pasur nevojë të vijnë në Tiranë për ekzaminimin e gjirit", tha Manastirliu. Me vendosjen e mamografisë në Lezhë dhe së shpejti në Fier plotësohen të gjitha nevojat e spitaleve rajonale në vend. "Bëhemi gati për të nisur programin kombëtar të depistimit të kancerit të gjirit, me vendosjen e mamografisë së detyrueshme për gratë. Synojmë të arrijmë targetin për të depistuar 40 mijë gra në vit", tha Manastirliu. Në spitalin e Lezhës është hapur për herë të parë edhe shërbimi i kimioterapisë. "Me hapjen e kabinetit të kimioterapisë në Lezhë, shkon në 7 numri i spitaleve rajonale që ofrojnë kimioterapinë afër vendbanimit për pacientët që vuajnë nga tumoret. Me buxhetin 2020 mbështesim trajtimin me citostatikë në spitale", tha Manastirliu.

NJOFTIM SHITJE ME ANKAND