Batutat e Ramës: Shqiptarët janë si Shën Thomai, po nuk të prekën nuk besojnë
Familja
Zela në Vaqarr u bë me shtëpi të re për Krish tlindje. Kryeministri Rama së bashku me kryetarin e bashkisë Erion Veliaj dhe aktorin Gaz Paja, ishin dje në familjen Zela që u fut në banesën e rindërtuar. "Shtëpia e re e familjes Zela, që u godit keqas nga tërmeti i shtatorit, çel dyert në ditën e bekuar të Krishtlindjeve bashkë me urimin për shëndet, mbarësi e jetë të lumtur familjare" shprehet Rama. E ndërsa u dha dhuratat fëmijëve të familjes bashkë me Veliajn, kryeministri kishte vetëm një kërkesë. "Si e kishe atë shtëpinë tjetër copë- copë, shiko këtë tani, nuk ke justifikim, dhe nuk po të kërkojmë të bësh ndonjë punë, por të na sjellësh ca 10- ta në shtëpi. Kur i sjell ti 10- tat, a di si janë për mamin? Si ato çokollatat atje, kur i sjell 8- ta janë si qepë" tha kryeministri. Gjatë bisedës me kryebashkiakun për shkollat dhe godinat e tjera të dëmtuara nga tërmeti, Rama nuk kurseu batutat. "Shqiptarët e kanë po nuk të prekën nuk besojnë, nuk janë të Krishtit, janë të Shën Thomait, po ta prek, ta besoj"- tha z. Rama. Po dje Kryeministri drekoi për Krishtlindje në një familje në fshatin Gjormë të Laçit. Gjatë vizitës, Rama shkëmbeu shumë batuta, ndërsa premtoi se në festat e fundvitit tjetër, të gjitha familjet që janë prekur nga tërmeti do të jenë në shtëpi të reja. "Dua të uroj Gëzuar Krishtlindjen të gjithëve, pa dallim feje se i festojmë të gjithë. Edhe Krishtlindjet, edhe Bajramin e festojmë të gjithë. Një urim sidomos për të prekurit nga tërmeti. Vitin tjetër Krishtlindjet iu gjejnë në shtëpinë e re. Do të ngrihen komplekse, me projekt, ku do të strehohen të gjithë ata që janë prekur nga tërmeti. Do të bëhet Laçi qytet mjaft interesant", tha z. Rama.