10 klube në stadium për Kumbullën, por ai që shkëlqen është Rrahmani
Nga Junajtid te Betisi, pa harruar edhe gjigantët e Serisë A. Skautët kishin mbushur stadiumin "Bendetodi" Mediat italiane janë të sigurta, ofertë milionere për Veronën
Marash Kumbulla është kthyer në objektin e dëshirave të shumë skuadrave në Itali e jashtë saj. Edhe pse përflitet për një akord me Interin për transferimin e futbollistit, janë të shumta ekipet që vazhdojnë të monitorojnë nga afër mbrojtësin shqiptar, duke shpresuar që të arrijnë të nënshkruajnë me të. Sipas mediave italiane, në ndeshjen e sotme mes Veronës dhe Xhenoas, në stadium janë 10 klube, të cilët kanë dërguar zyrtarisht skautë të tyre në tribunë për të ndjekur paraqitjen e futbollistit shqiptar. "Sky Sport" ka siguruar listën e klubeve dhe ajo është mbresëlënëse, pasi ka emra të mëdhenj të futbollit europian, përveç atyre italianë. Dje zyrtarisht në tribunë për Kumbullën kanë qenë Çelsi, Mançester Junajtid, Sauthempton, Eintraht Frankfurt, Borusia Dortmund dhe Betis Sevilja nga jashtë Italisë, ndërsa nga klubet vendëse janë përfaqësues të
Fiorentinës, Atalantës, Juventusit dhe Milanit. Ndërkohë, skuadra e Veronës fiton përsëri dhe e sheh veten në pozicion "luksi" në renditjen e Serisë A në këtë pikë të sezonit. Skuadra e Kumbullës dhe Rrahmanit, si zakonisht titullarë, ka mundur dje 2- 1 me përmbysje Xhenoan dhe është ngjitur në vendin e 8- të në renditje, duke kapërcyer skuadra si Napoli e Milani. Gjithçka ka ardhur falë një loje të mirë përballë Xhenoas, edhe pse kjo e fundit gjeti e para golin me anë të Sanabria në fundin e pjesës së parë, pas një prej të paktave gabime në rreshtimin e prapavijës veroneze. Por në pjesën e dytë të duelit, në prapavijë Verona ishte e pakalueshme dhe filloi të shihte gjithnjë e më shumë nga sulmi, duke barazuar me penalltinë e Verre dhe duke gjetur më pas fitoren me golin e Zakanjit. Për këtë të dytin, meritën më të madhe e ka Amir Rrahmani, i cili me një galopim mbresëlënës nga gjysmëfusha e vet arriti deri në zonën kundërshtare, ku vuri në prove reflekset e Perin. Gardiani grushtoi sferën, por e la para katërkëndorit ku Zakanji me shpejtësi e shtyu në rrjetë. Një tjetër konfirmim i aftësive të mbrojtësit të Kosovës, për të cilat Napoli vendo të blinte kartonin e tij duke e prenotuar për sezonin e ardhshëm.