Përurohet spitali i ri kirurgjikal ' Frederik Shiroka' në QSUT, Rama: Së shpejti dy të tjerë
Manastirliu: Shtatë salla moderne operacioni
Ditën
e djeshme ka çelur dyert për pacientët spitali më i ri i kirurgjisë "Frederik Shiroka" në Qendrën Spitalore Universitare "Nënë Tereza". I pranishëm në përurimin e spitalit ishte edhe kreu i qeverisë, Edi Rama i shoqëruar nga ministrja e Shëndetësisë dhe Mbrojtjes Sociale, Ogerta Manastirliu. Kjo e fundit gjatë fjalës së mbajtur bëri me dije se spitali i ri ka 7 salla operacionesh me aparatura të teknologjisë së lartë. "Ajo çfarë kemi bërë është më shumë nga ajo çfarë flas unë sot. Ka qenë vizioni i Kryeministrit
Rama që e çoi deri në fund këtë projekt transformues. Rruga e modernizimit materializohet sot me spitalin e ri me kapacitet 120 shtretërish, 7 salla operacionesh, me pajisje të fjalës së fundit të teknologjisë. Investimi më i rëndësishëm për kirurgjinë në 90 vite", tha Manastirliu. Ndërkohë kryeministri ka bërë me dije se së shpejti do të ketë një spital të ri për Sëmundjet e Brendshme dhe një Pediatri të re. "Krenar për spitalin e ri të kirurgjisë dhe punën fantastike të Ogertës e skuadrës së saj. "Një ëndërr e bërë realitet", siç e quajti profesori legjendar Besim Elezi; një spital i rangut europian në çdo aspekt. Së shpejti spitali i ri i sëmundjeve të brendshme dhe pediatria e re",- sqaroi Rama.
TRANSFORMIMI I QSUT
Ministrja Manastirliu tha se do të kryhen më shumë se 32 mijë ndërhyrje me aparatura të teknologjisë së lartë dhe me instrumentet e rinj kirurgjikalë, duke ulur ndjeshëm infeksionet. Manastirliu siguroi se investimet për modernizimin e QSUT do të vijojnë. "Transformimi i qendrës më të madhe spitalore në vend, vijon me investime të tjera. Plot 30 milion dollarë po investojmë në QSUT, për ndërtimin e spitalit të ri të sëmundjeve të brendshme, i cili përfundon vitin e ardhshëm dhe ndërtimin dhe rehabilitimin e spitalit pediatrik, investime që do të kenë ndikim të drejtpërdrejtë në përmirësimin e shërbimit shëndetësor për qytetarët", theksoi Manastirliu. Nga këto investime në QSUT përfitojnë 350 mijë pacientë, rreth 3000 punonjës staf mjekësor dhe jo mjekësor, si dhe rreth 1,000 studentë të mjekësisë.