“I dënuar për armëmbajtje”, PD: T'i hiqet mandati kryebashkiakut të Matit
I pesti pas zgjedhjeve të 30 qershorit, PD i çon një tjetër emër prokurorisë Zbardhet vendimi gjyqësor për Agron Malajn
Demokratët
kërkuan dje heqjen e mandatit për një tjetër kryebashkiak nga radhët e socialistëve, që sipas tyre, është në kushtet e ndalimit të kandidimit dhe ushtrimit të një funksioni publik. Sekretari i Përgjithshëm, Gazment Bardhi publikoi një vendim të formës së prerë nga gjykata e Matit, ku rezulton se Agron Malaj është dënuar me 10 muaj burg në 18 tetor të vitit 1999 për mbajtje të armëve luftarake. Sipas Bardhit fshehja e këtij vendimi nga ana e Malajt në formularin e dekriminalizimit mjafton që prokuroria të nisë zyrtarisht verifikimin e të kaluarës së Kryebashkiakut të Matit. Partia Demokratike i ka kërkuar zyrtarisht Prokurorisë së Përgjithshme verifikimin e të kaluarës kriminale të Edi Ramës së Matit. Agron Malaj rezulton se ndodhet në kushtet e ndalimit për të kandiduar në një funksion publik. Ai është i dënuar me vendim gjyqësor të formës së prerë për armëmbajtje pa leje, dhe sipas ligjit për dekriminalizimin, i ndalohet kandidimi përjetë në një funksion publik. Ky është rasti i pestë pas atij të Shkodrës, Vorës, vaut të Dejës dhe Mallakastrës, që konfirmon se Edi Rama ka ardhur në pushtet falë mbështetjes së krimit dhe ndan pushtet me krimin. Ky është vendimi i gjykatës që konfirmon dënimin me vendim gjyqësor të formës së prerë të Agron Malajt, të kandidatit të Edi Ramës për Bashkinë e Matit",- u shpreh Gazmend Bardhi. Për këtë çështje Partia
Demokratike i ka kërkuar prokurorisë të nisë verifikimet. "Partia Demokratike i kërkon Prokurorisë së Përgjithshme dhe më pas Komisionit Qendror të Zgjedhjeve të veprojë pa asnjë vonesë me administrimin zyrtar të vendimit të gjykatës së Matit dhe për
heqjen e menjëhershme të mandatit për kryetarin e Bashkisë së Matit, Agron Malaj. Sot është koha që ligji të veprojë, dhe është koha që Edi Rama të mos fshihet pas Agron Malajt, Qerim Ismailajt, Valdrin Pjetit, Agim Kajmakut apo Mark Babanit por të dalë dhe të marrë përgjegjësi dhe t'u shpjegojë qytetarëve shqiptarë se përse alternativa e tij e vetme është krimi",- theksoi z. Bardhi. Agron Malaj është kryebashkiaku i pestë i akuzuar nga Partia Demokratike me të shkuar kriminale, ndërsa emri i tij ka qenë prezent në politikë për faktin se përmendet në dosjet e 21 janarit 2011, kur ushtronte funksion në Gardën e Republikës. Agron Malaj ishte një ndër 10 oficerët të njohur si "grupi i zjarrit",të cilët u shkarkuan nga ishministri i Brendshëm, Saimir Tahiri, sapo ky i fundit mori detyrën. Por Komisioni Qendror i Zgjedhjeve sqaron se nga verifikimi i formularit të dekriminalizimit, kryebashkiaku Agron Malaj e ka deklaruar vendimin e formës së prerë të gjykatës së Matit, ku rezulton të jetë dënuar me 10 muaj burg. Referuar ligjit të dekriminalizmit, KQZ thotë se të dhënat e deklaruara nuk përbëjnë kusht për mosregjistrimin e Agron Malajt si kandidat.