Meningjiti, infeksionisti Tritan Kalo: Nuk ka vend për panik, arsyetoni
"Nuk përbën shqetësim kombëtar, klinik dhe epidemiologjik"
Meningjiti
nuk përbën shqetësim kombëtar, klinik dhe epidemiologjik dhe nuk ka vend për panik, por për arsyetim logjik. Ky është shpjegimi që Dr. Tritan Kalo, mjek infeksionist, tropikalist dhe reanimator i sëmundjeve infektive ka bërë ditën e djeshme në faqen e tij zyrtare në rrjetin social Facebook. "Është krijuar një panik i pajustifikueshëm, deontologjikisht i papranueshem dhe ligjërisht i dënueshëm, në lidhje me infeksionet e cipave të trurit nga Neisseria meningitidis, ose sikundër më shpesh ky mikroorganizëm njihet, nga Meningokoku.
Ju kolegë, miq e bashkëqytetar që jo pak më keni telefonuar apo shkruar këto ditë, për t'ju sqaruar edhe më shumë po u sjell informacionin më të fundmit të ISHP- së ( Institutit të Shëndetit Publik): "Infeksionet e shkaktuara nga N. meningitidis apo Meningokoku njihen në vendin tonë, ku midis tyre vendin kryesor e zë Meningitis bacterialis i shkaktuar nga ky bakter. Gjatë viteve 2001 - 2019 janë raportuar 133 raste ( pra në 20 vitet 2001- 2019 kemi 133 raste të raportuara në të gjithë vendin, ose mesatarisht 6.6 raste në vit, TK). Gjatë vitit 2019 janë raportuar si Meningit bakterial meningokoksik 5 raste ( 0.2 incidence raste/ 100.000 banorë), Meningite bakteriale jo meningokoksik 18 raste ( 0.6 incidence raste/ 100.000 banore) dhe si Meningite virale aseptike 7 raste ( 0.2 incidence, raste/ 100.000 banore)."",- thekson mjeku i njohur duke sjellë për publikun informacionet më të fundit nga ISHP.
SQARIMI
"Sa mijëra e mijëra të sëmurë trajtohen në Shqipëri me infeksione nga më të ndryshmet, përse bëhet gjithë kjo zhurmë për diçka që nuk përbën asnjë shqetësim kombëtar klinik dhe epidemiologjik?! Përse gjithë kjo tollovi për vaksinim ndaj Meningokokut, kur një vaksinim i tillë nuk përfshihet në skemat e Vaksinimit të Detyrueshëm në asnjë vend të Botës. Për profilaksinë e përhapjes në personat e kontaktit të ngushtë me një të sëmurë të tillë, ka mundësi efektive terapeutike antibakteriale ( Ciprofloxacin, Rifampicine), gjë për të cilën do të merni këshillat e duhura dhe shumë të vyera nga mjekët trajtues të tyre, përpos vaksinimit vetëm në disa raste specifike. Më pak panik dhe më shumë arsyetim logjik. Jeta vazhdon!!!",- thekson Kalo.