Urdhri për zgjedhjet në universitete: Kandidatët do kontrollohen për plagjiaturë
Në 9 prill nis fushata për drejtuesit e IAL- ve publike, zgjedhjet në 8 maj "Para aplikimit duhet të bëhet vlerësimi nga Këshilli i Etikës"
Në 8 maj të këtij viti do të zhvillohen zgjedhjet për autoritetet dhe organet drejtuese në institucionet publike të arsimit të lartë, ndërkohë fushata e procesit zgjedhor do të nisë në 9 prill të 2020- ës. ' Gazeta Shqiptare' zbardh sot urdhrin më të fundit të MASR për zgjedhjet e drejtuesve në universitete. Nëpërmjet urdhrit nr. 8 të datës 14.01.2020, "Për procesin zgjedhor për autoritetet dhe organet drejtuese në institucionet publike të arsimit të lartë", ministrja e Arsimit, Sportit e rinisë ka shpjeguar procedurën që duhet të ndjekin IAL- të publike në vend.
URDHRI I MASR
Rregullorja e zgjedhjeve, duhet të miratohet 60 ditë para fillimit të procesit zgjedhor e të depozitohet pranë Ministrisë së Arsimit, Sportit e Rinisë. "Në mbështetje të pikës 4 të nenit 102 të Kushtetutës dhe të nenit 131 të ligjit nr. 80/ 2015, "Për arsimin e lartë dhe kërkimin shkencor në institucionet e arsimit të lartë në Republikën e Shqipërisë" urdhëroj: Fillimin e procesit zgjedhor për autoritetet dhe organet drejtuese në institucionet publike të arsimit të lartë, në datën 9.4.2020. Institucionet publike të arsimit të lartë të marrin masat që të miratojë rregulloren e zgjedhjeve, 60 ( gjashtëdhjetë) ditë përpara datës së fillimit të procesit zgjedhor, të cilat duhet të depozitohen pranë Ministrisë së Arsimit, Sportit e Rinisë",- theksohet në udhëzimin e firmosur nga ministrja Besa Shahini. Gjithashtu, në urdhër bëhet me dije se data e zhvillimit të zgjedhjeve për autoritetet dhe organet drejtuese në institucionet publike të arsimit të lartë të jetë data 8 maj 2020.
KRITERET PËR KANDIDATËT
Para aplikimit kandidatët do të vlerësohen për titujt akademikë si dhe do të kontrollohen për plagjiaturë. "Kandidatët për autoritete drejtuese dhe kandidatët për anëtarë të organeve drejtuese në institucionet publike të arsimit të lartë, me qëllim garantimin e integritetit të lartë, përpara aplikimit duhet të kenë marrë vlerësim pozitiv nga Këshilli i Etikës, i cili verifikon
ligjshmërinë e fitimit të gradës shkencore dhe titullit akademik, përfshirë kontrollin antiplagjiaturë",- nënvizohet në urdhrin e ministres Shahini. Sakaq, kriteti i vlerësimit të kandidatëve nga Këshilli i Etikës dhe procedurat do të përcakto
hen në rregulloret e zgjedhjeve në universitetet publike. Urdhri ka hyrë në fuqi dhe për zbatimin e tij janë ngarkuar Sekretari i Përgjithshëm i Ministrisë së Arsimit, Sportit dhe Rinisë dhe institucionet publike të arsimit të lartë.