Ministrja Manastirliu: Do të rehabilitohen 120 qendra shëndetësore në 2020- ën
Hapet qendra e re shëndetësore në Gostimë të Cërrikut, përfitojnë 13 mijë banorë Taulant Balla: Rikonstruksioni ishte i domosdoshëm
Ditën e djeshme është hapur qendra e re shëndetësore e Gostimës në Cërrik, e rindërtuar në kuadër të programit kombëtar të rehabilitimit të 300 qendrave shëndetësore. Ministrja e Shëndetësisë dhe Mbrojtjes Sociale, Ogerta Manastirliu dhe kryetari i grupit parlamentar socialist, Taulant Balla inspektuan mesditën e sotme qendrën e re shëndetësore të Gostimës në Bashkinë e Cërrikut. "Është një premtim i mbajtur rehabilitimi i qendrës shëndetësore Gostimë, një qendër që u shërben 13 mijë banorëve. Vetëm gjatë 2018- 2019 rehabilituam 180 qendra shëndetësore dhe ka rëndësi të thuhet që janë me të njëjtin standard, në qytet dhe në fshat. Ne planifikojmë këtë vit rindërtimin e 120 qendrave shëndetësore dhe ambulancave. Vetëm në qarkun e Elbasanit janë 16 qendra shëndetësore dhe ambulanca të rehabilituara dhe do të vijojmë këtë vit edhe me qendrën shëndetësore 24- orëshe të Cërrikut, Belshit etj.", tha Manastirliu. Ndërkohë, kryetari i grupit parlamentar socialist dhe drejtuesi i qarkut të Elbasanit, Taulant Balla, vlerësoi investimin e qeverisë për kujdesin parësor. "Rikonstruksioni i qendrës shëndetësore të Gostimës ishte i domosdoshëm për shkak të kushteve, numrit të madh të banorëve, por edhe faktit që kjo qendër ndodhet në kryqëzim rrugësh dhe u shërben edhe kalimtarëve", tha Taulant Balla. Me programin e 300 qendrave shëndetësore, që përmbyllet këtë vit me rindërtimin e 120 të tillave nga veriu në jug, jo vetëm është garantuar përmirësimi i kushteve të punës falë rehabilitimit infrastrukturor dhe pajisjeve të reja, por edhe është ndërtuar një model i standardizuar dhe i unifikuar i qendrave shëndetësore qoftë në zona urbane, ashtu edhe në ato rurale.