I dërguari i Trump në Kosovë: Hiqni taksën 100% me Serbinë
Takimet me Albin Kurtin dhe Isa Mustafën, kërkesa: Lini pas mosmarrëveshjet Grenell: Formimi i qeverisë nuk është problemi i yni
Kosova duhet ta heqë tarifën 100 për qind, kurse Serbia të ndalë fushatën kundër njohjeve të Kosovës", kështu ka deklaruar dje në Prishtinë, i dërguari i posaçëm i Presidentit Donald Trump për dialogun mes Prishtinës dhe Beogradit, ambasadori Richard Grenell. Këto komente ai i bëri pas takimit që zhvilloi me kryetarin e Lëvizjes Vetëvendosje, Albin Kurti, i mandatuar për formimin e qeverisë së re. Ambasadori Grenell tha se i ka kërkuar Kurtit që t'i lërë anash mospajtimet politike, të formojë qeverinë dhe të përqendrohet në zhvillimin ekonomik të vendit. Kurse mesazh i veçantë ishte që taksa 100 për qind, të cilën Kosova u ka vendosur importeve nga Serbia dhe Bosnje e Hercegovina që nga nëntori i vitit 2018 duhet të hiqet. "Është shumë e rëndësishme që nëse duam përparime në zhvillimin ekonomik, tarifa 100 për qind duhet të hiqet. Kjo është diçka që duhet të hiqet në të njëjtën kohë që Serbia duhet të ndalë fushatën kundër njohjeve të Kosovës", tha ambasadori Grenell. Z. Grenell tha se çështja e formimit të qeverisë nuk është problem i tiji dhe nuk dëshiron që të përzihet në këtë punë. "Ne po e shikojmë këtë çështje nga jashtë, por do të them dy gjëra: e para, i thash zotit Kurti se shtetet si Mbretëria e Bashkuar dhe Gjermania kanë pasur përplasje për koalicionet ( qeverisëse), teksa kanë tentuar që të formojnë qeverinë. Prandaj i thash atij se ne po presim të shohim se çfarë do të ndodhë", tha Grenell. "Gjëja e dytë që dëshiroj ta bëj të qartë është se shtytja ekonomike që unë dua ta bëj është shumë e rëndësishme. Krijimi i vendeve të punës, sjellja e bizneseve evropiane dhe amerikane në Kosovë. Njerëzit janë të uritur që të futen në tregun e Kosovës dhe që të ndihmojnë që ekonomia e saj të rritet", tha ai. Grenell ka folur edhe për marrëveshjen me Serbinë. "Shikojeni prosperitetin në Amerikë dhe jemi në ' zjarr'.
Po marrim industri të reja e po i rrisim, sepse po përpiqemi të ndihmojmë bizneset dhe fokusi është në punë dhe ekonomi. Si t'u jepet të rinjve punë e shpresë. Ajo që kam dëgjuar nga bizneset amerikane është se duan të vijnë këtu, por mendojnë se ka konflikt. Ka apo jo, kjo i frikëson njerëzit. Ajo që përpiqem të bëj është të sjell bizneset këtu e nuk shqetësohem për luftërat politike. Realiteti është se edhe qeveritë në gjithë botën kanë këto diskutime të vështira për formimin e qeverisës. E inkurajuam Kurtin të ndjekë ligjin dhe çështja e taksës mbetet e rëndësishme, ajo duhet të hiqet", tha Grenell. Duke theksuar se nuk vendos ai për koalicionin qeverisës, i dërguari i Trump u shpreh se i ka dhënë disa këshilla Kurtit. "I thashë Kurtit që vendet si Britania e Gjermania po e përcjellin situatën. I thashë të ndjekë ligjin, nëse do që të arrihet suksesi. I fola për
çështjet ekonomike. Gjëja më e rëndësishme është krijimi i vendeve të punës. Njerëzit janë të interesuar që të ndihmojnë ekonominë këtu, administrata e Trumpit ka qenë mjaft e suksesshme në rritje të ekonomisë, duke ndihmuar bizneset përmes politikave qeverisëse", - tha ai. Grenell është takuar gjithashtu edhe me liderin e LDK- së, Isa Mustafën. Ai e ka falënderuar kreun e LDK- së, Isa Mustafën për pritjen, teksa ka përsëritur se nuk do të përfshihen në formimin të qeverisë së re. Grenell ka shtuar se janë të interesuar në zhvillim ekonomik. Ambasadori amerikan në Berlin ka bërë thirrje që të hiqet tarifa, ndërsa ka përsëritur
se do të kërkojë në Beograd që të ndalet fushata për heqje të njohjes së Kosovës. "Sapo u takova me liderët e LDK- së, dua që të falënderoj z. Mustafën që na ka pritur. Kemi parë disa fotografi prej karrierës së tij dhe ka shumë eksperiencë. Ndava mesazhin e njëjtë që ne në Amerikë nuk jemi të interesuar që të përfshihemi në mënyrën se si do të formohet qeveria. Ne jemi të interesuar në zhvillim ekonomik dhe ndava vizionin tim për të arritur aty shumë shpejt duke hequr tarifën, ndërsa serbët duhet të ndalin fushatën për tërheqje të njohjes së Kosovës. Kemi folur specifikisht për projektet e radhës që janë duke u planifikuar", ka
thënë ai. I deleguari amerikan në dialog ka thënë se duhet të ndalen përplasjet
politike dhe duhet të mendohet për zhvillim të ekonomisë.