Doli në përgjimet e grupit "Avdylaj", gjykata pushon çështjen ndaj ish- deputetit Arben Çuko
"Nuk ekziston vepra penale e moskallëzimit të krimit"
TIRANE - Gjykata e Tiranës ka vendosur të pushojë çështjen ndaj ish- deputetit të Partisë Socialiste dhe ish- drejtorit të Burgjeve, Arben Çuko, duke mos kaluar dosjen në ngarkim të tij për gjykim, pasi sipas këtij institucioni nuk ekziston vepra penale e moskallëzimit të krimit ndaj tij. Pak muaj më parë, gjykata ndryshoi masën e sigurisë për ish- deputetin nga "arrest shtëpie" në "detyrim paraqitje". Arben Çuko u arrestua pak muaj më parë në kuadër të operacionit "VOL- VO4", në 18 tetor 2018, pasi doli në përgjimet e grupit "Avdylaj", pjesë e dosjes së famshme 339. Në këto përgjime Çuko u zbulua se favorizoi një të dënuar për të lëvizur nga një burg në një tjetër. Në atë kohë policia njoftoi se "Arben Çuko ( ishDrejtor i Përgjithshëm i Burgjeve) u arrestua i akuzuar për kryerjen e veprës penale "Korrupsioni pasiv i funksionarëve të lartë shtetërorë ose i të zgjedhurve vendorë", parashikuar nga neni 260 i Kodit Penal". Në këto përgjime Çuko u zbulua se favorizoi një të dënuar për të lëvizur nga një burg në një tjetër. Gjithashtu, Arben Çuko u akuzua edhe për korrupsion, pasi shoferi i tij dyshohet se kishte marrë një shumë parash për të lehtësuar kushtet e një të dënuari. Burime nga Prokuroria thanë aso kohe se arrestimi i Çukos është kërkuar pas një hetimi disamujor, pasi dyshohet se kundrejt lejeve që jepte për të burgosurit merrte para në formë ryshfeti. Sipas informacioneve të para, Çuko është zbuluar nga përgjimet e një grupi të përfshirë në trafik droge. Në një rast kur po përgjohej një nga anëtarët e grupit kriminal të trafikut të drogës ka dalë emri i Çukos, ku diskutohej se ai jepte leje për të burgosurit kundrejt pagesave. Një nga rastet e dokumentuara nga ana e
Prokurorisë, me indicien edhe të Ministrisë së Drejtësisë, dyshohet se Arben Çuko ka përfituar para dhe një automjet për transferimin e një të dënuari. Bëhet fjalë për të dënuarin Olsi Karagjozi, i arrestuar në janar të vitit 2013 dhe i dënuar me 14 vjet e 8 muaj burg.
Në kohën kur ky person u arrestua, Policia shprehej se ai ishte paguar për 5 vrasje, të cilat kishin dështuar. Megjithatë, ai u dënua vetëm për një ngjarje që iu provua, kur plagosi dy persona.