Partizani turpërohet në Lezhë, Besëlidhja mposht kampionët 3- 0
Kupa e Shqipërisë/ Tirana, Kukësi, Teuta dhe Skënderbeu "OK", Apolonia befason Luftëtarin Paqe në Vllaznia- Flamurtari, kualifikimi vendoset në Vlorë
Kampionati i la radhën Kupës së Shqipërisë ditën e djeshme, teksa u luajtën ndeshjet e 1/ 8tave. Klubet të cilat aktivizohen në Kategorinë Superiore cilësoheshin favorite në letër për të prekur çerekfinalet, pasi u ndeshen me skuadra të Kategorisë së Parë. Kështu në Grupin A bëri përshtypje disfata e Partizanit në transfertë ndaj Besëlidhjes me rezultatin 30. Të kuqtë reflektuan formën e dobët të këtij viti, ndërsa morën humbjen e tretë radhazi, duke llogaritur edhe kampionatin. Kryeqytetasve nuk ka arritur t'i gjejë kurën as trajneri Adolfo Sormani, për të cilin tashmë mund të jenë ngritur pikëpyetje, por mbi të gjitha kjo situatë vërteton dhe gabimet radhazi të drejtuesve të kuq, gabime që nisëm që me largimin e Skënder Gegës nga stoli.
Besëlidhja nga ana tjetër meriton duartrokitje, teksa të tre golat e sfidës i realizuan në pjesën e parë. Tashmë, kualifikimi i Partizanit në çerekfinale është në dyshim serioz. Ndërkaq, nga ana tjetër, Tirana përmbysi shifrat me Kastriotin. Bardheblutë pësuan të parët, por në pjesën e dytë trajnerin Emanuel Egbo e nderoi akademia e kryeqytetasve, kjo pasi golat erdhën nga talentet Ismailgeci dhe sulmuesi Ernest Muçi duke hedhur një hap të sigurt drejt kualifikimit. Sa u përket sfidave të tjera, Teuta mori një fitore bindëse me Erzenin, duke i mposhtur këta të fundit në transfertë me rezultatin 1- 3. Ndërkohë, Vllaznia rrezikoi jo pak humbjen, ndërsa shmangu disfatën në fund me golin e Likës ndaj Flamurtarit. Kukësi dhe Skënderbeu bënë detyrën në transfertë përballë Lushnjës dhe Besës, duke hedhur një hap të sigurt drejt kualifikimit në raundin pasardhës, ndërkohë që Apolonia e Mërgjyshit, shtangu Luftëtarin e Kategorisë Superiore, duke e mposhtur me rezultatin e pastër 3- 0.