Ahmetaj: Përcaktohen 18 zona për rindërtim
Banorët e dëmtuar, ja si të aplikoni për shtëpi
Janë
përcaktuar 18 zona për rindërtim. Shtëpitë e pallatet e reja do të ndërtohen bashkëkohore dhe antisizmike. Qytetarët duhet të aplikojnë në platformën "online" për të përfituar shtëpi. Janë 75 zyra që do t'u shpërbejnë qytetarëve. Deri tani kanë aplikuar 200 qytetarë. Të gjithë të dëmtuarit nga tërmeti duhet të aplikojnë për të përfituar shtëpi. Detajet u bënë të ditura nga ministri i Rindërtimit, Arben Ahmetaj, në një konferencë për mediat. Ahmetaj bëri të ditur se qeveria ka miratuar sot 18 zona për rindërtim. Ministri tha se është marrë vendimi për shpalljen e zonës së re në njësinë administrative në Shijak, në Kurbin, Thumanë, në Krujë janë dy zona, njëra në Bubq dhe tjetra në Fushë- Krujë. Në Bashkinë e Durrësit është shpallur një zonë, në Vorë një zonë dhe në Kavajë një zonë në qytet, ndërsa në Bashkinë Tiranë kemi 9 zona. "Gjithashtu, dua të shpjegoj edhe njëherë për opinionin publik dhe të gjithë qytetarët që janë prekur nga tërmeti, duke i garantuar se këto dy muaj qeveria në bashkëpunim me pushtetin vendor i kanë shfrytëzuar maksimalisht për të bërë nga ' A'- ja e procedurave ligjore, deri te shpallja e zonave. Ndërkohë, gjej rastin t'iu bë edhe njëherë thirrje qytetarëve, por edhe njësive vendore, që të përshpejtojnë procesin e aplikimit në platformën elektronike. Është proces ligjor i domosdoshëm që të kalojmë në hapat e tjera, që nga përfitimi i granteve deri te përfitimi i metrave katrorë që do të jetë i domosdoshëm edhe për planifikimin", - tha Ahmetaj. Sipas tij, janë 75 zyra në dispozicion të qytetarëve. "Deri tani janë hapur 75 zyra dhe janë 130 punonjës në dispozicion të qytetarëve. U njoftova që në vetëm dy ditë kanë aplikuar mbi 200 familje, ju lutem të dashur qytetarë, aplikoni sa më shpejt. Procesi është fare i thjeshtë, i keni bashkitë, njësitë administrative gjithashtu, kryepleqtë dhe punonjësit e bashkive, zyrat e rindërtimit, por edhe mua personalisht e stafin tim në dispozicion për të ecur sa më shpejt me procesin e aplikimit në platformën elektronike", - tha Ahmetaj.