Reforma në drejtësi dhe negociatat, Meta takon Palmer në SHBA
"Anti- KÇK", presidenti: Krimi nuk luftohet me fushata. Po hidhet në erë reforma "Mazhoranca po kthen Kushtetuesen në organizatë partie"
Presidenti i Republikës priti dje në një takim në Ambasadën e Shqipërisë në Uashington, Zëvendës- ndihmës Sekretarin e Shtetit, si dhe të dërguarin special të SHBA për Ballkanin Perëndimor, z. Matthew Palmer. Në fokus të takimit ishte shtimi i përpjekjeve të përbashkëta për çeljen e negociatave midis Shqipërisë dhe Bashkimit Europian, zbatimi i reformës në drejtësi dhe konsolidimi i shtetit ligjor, si e vetmja rrugë për të avancuar drejt integrimit të vendit në BE. Bashkëbiseduesit theksuan rëndësinë e forcimit të bashkëpunimit rajonal në Ballkanin Perëndimor dhe të perspektivës së përbashkët europiane. Në takim mori pjesë edhe ambasadorja e Shqipërisë në SHBA, znj. Floreta Faber.
Po dje presidenti Ilir Meta gjatë qëndrimit në SHBA takoi kongresmenin Steve Watkins. Meta thekson se është i lumtur që Watkins mbështet partneritetin strategjik mes Shqipërisë dhe SHBA. "Kongresmeni Steve Watkins i Komisionit të Marrëdhënieve me Jashtë është pjesë e gjeneratës së ardhshme të lidershipit të madh amerikan. Vizioni, guximi dhe përvoja e tij në luftën kundër terrorizmit është e mirënjohur. I lumtur që ai mbështet partneritetin strategjik mes Shqipërisë dhe SHBA. Zoti e bekoftë miqësinë shqiptaro- amerikane! ", - shkruan Meta. Ai takoi edhe kongresmenin Eliot Engel: "Përherë i lumtur të takohem me mikun e çmuar të kombit shqiptar, Eliot Engel, Kryetar i Komisionit për Politikën e Jashtme në Kongresin Amerikan. Në bisedën e përzemërt dhe të hapur, vlerësuam rëndësinë e partneritetit strategjik dhe forcimit të mëtejshëm të marrëdhënieve të shkëlqyera shqiptaro- amerikane. Si njohës i shkëlqyer i rajonit, ai është edhe një përkrahës i angazhimit të vazhdueshëm të SHBA për të konsoliduar të gjitha arritjet e deritanishme në Ballkan për paqen, stabilitetin, sigurinë, demokracinë e shtetin ligjor, dhe forcuar lidhjen tonë transatlantike".
EMERIMET
Presidenti Ilir Meta denoncoi dje përpjekjet e mazhorancës për ta kthyer në një organizatë partie. Gjatë një interviste për Zërin e Amerikës, z. Meta foli për hapat e mazhorancës socialiste për të shmangur betimin tek Presidentit të anëtarëve të rinj të Gjykatës Kushtetuese, Presidenti i Republikës, akuzoi se kjo Gjykatë po shndërrohet në një organizatë partie. Gjatë intervistës për Zërin e Amerikës, Meta thekson se me kapjen e Gjykatës Kushtetuese, po hidhet në erë reforma në drejtësi. "Më duhet të them se është për të ardhur keq që ndërmerren nisma të tilla që tregojnë mungesë respekti për shtetin ligjor dhe Kushtetutën që e kemi miratuar me 140 vota. Është një kokëfortësi, e cila nuk na ndihmon të rrisim besueshmërinë brenda dhe jashtë vendit se po zbatojmë në mënyrë të përgjegjshme reformën në drejtësi, aq më tepër për institucionin më të rëndësishëm, siç është Gjykata
Kushtetuese. Të bësh një ligj mbi Kushtetutën, nuk është gjë tjetër vetëm se një përpjekje për të shndërruar Gjykatën Kushtetuese në një organizatë partie dhe për të hedhur në erë besueshmërinë e gjithë sistemit të drejtësisë. Është Presidenti, i cili gjithmonë ka bërë më të mirën që Shqipëria të mos ngelej asnjë orë pa Gjykatë Kushtetuese funksionale. Në rastin e fundit, është Presidenti që ka bërë të gjitha përpjekjet për të mos cenuar integritetin e krijimit të Gjykatës Kushtetuese. Kushtetuta e ka të shkruar germë për germë radhën kushtetuese se si veprohet në këtë rast dhe Presidenti e respektuar dhe ka kërkuar bashkëpunimin e Kuvendit. Është e qartë gjithë përpjekja e mazhorancës për të kapur edhe këtë institucion të fundit të pa kapur prej saj për qëllime afatshkurtra politike, duke hedhur në erë gjithë besueshmërinë e këtyre proceseve reformuese",deklaroi z. Meta.
PAKETA
Presidenti Ilir Meta teksa komentoi paketën Anti' KÇK' në kuadër të Operacionit Forca e Ligjit, që po godet eksponentë të krimit dhe asetet e tyre të ngritura nga veprimtaria kriminale, deklaroi se kjo luftë duhet të vijojë çdo ditë dhe jo vetëm në fushata. Në intervistën për ' Zërin e Amerikës', Meta pohoi se legjislacioni në fjalë për këtë paketë ka qenë aty, ndërsa shtoi se nuk mund të bëhen mbivendosje. Po ashtu ai tha mesazhin e qartë se politika, duke nisur nga vetë kreu i shtetit, kryeministri, Kryetari i Kuvendit, nuk duhet të ndërhyjnë në drejtësi. Mes të tjerash ai tha se askush s'e pengon qeverinë të ngrejë task- forca. "Lufta kundër krimit është një kërkesë e vjetër. Kjo është një luftë që zhvillohet çdo ditë, jo me fushata. Mendimi im ishte se i gjithë legjislacioni ka qenë aty, askush nuk e pengon që të ngrenë task- forca të vazhdueshme. Por kur bëhet ndërhyrje në legjislacion, ato duhet të jetë të mirëmenduara. Nuk duhet të bëhen mbivendosje. Sepse nuk i shërbejnë forcimit të ligjit. Ajo që mund të bëhet është shembulli i gjithë politikanëve, nga presidenti i Republikës, nga kryeministri, në respektimin e Kushtetutës, në mosndërhyrje në çështje të drejtësisë. Çdo përpjekje që kërkon të shtyjë dhe të vërë në tryseni institucionet e reja të drejtësisë, të cilat janë krijuar në klimë të polarizuar, si shërben forcimit ligjor, ndaj duhet të reflektojmë që të rivendosim qetësinë", - tha z. Meta.
"Lufta kundër krimit është një kërkesë e
vjetër. Kjo është një luftë që zhvillohet çdo ditë, jo me fushata. Mendimi im ishte
se i gjithë legjislacioni ka qenë aty, askush nuk e pengon që të ngrenë task
forca të vazhdueshme” .