Agjencia e Kadastrës, 600 personat që kanë gati lejet e legalizimit

Ndërtimet pa leje, pronarët duhet të tërheqin dokumentin në zyrat e Agjencisë Përfituesit në qarqet Elbasan dhe Fier

Agjencia Shtetërore e Kadastrës publikon listën me 600 persona që kanë ndërtuar pa leje dhe kanë gati lejet e legalizimit. Përfituesit janë në qarqet Elbasan dhe Fier. Në faqen zyrtare të Agjencisë Shtetërore të Kadastrës është publikuar lista me përfituesit. Ndërkohë që procedurat për marrjen e tapisë do të ndiqen nga Agjencia Shtetërore e Kadastrës, e cili dorëzon dosjen e plotë në Hipotekë. Menjëherë pas regjistrimit të certifikatës së pronësisë, përfituesit do të njoftohen për tërheqjen e saj. Pas ndryshimeve të fundit ligjore, qytetari do të marrë një kopje për të vërtetuar mbarimin e procesin të legalizimit, por e gjithë procedura vijuese për regjistrimin në

Zyrën e Regjistrimit të Pasurive të Paluajtshme do të bëhet nga Agjencia Shtetërore e Kadastrës. Ndërkohë, që sipërfaqja e parcelës, për të cilën miratohet kalimi i së drejtës së pronësisë nuk mund të jetë më e madhe se trefishi i sipërfaqes së bazës së ndërtimit dhe për ndërtimet pa leje me funksion banimi jo më shumë se 500 m ² . Sipërfaqet mbi masat e përcaktuara në këtë pikë, të cilat, për shkak të përmasave ose konfiguracionit nuk mund të shfrytëzohen më vete për ndërtim, i shiten poseduesit të ndërtimit pa leje sipas vlerës së pronës, të miratuar me vendim të Këshillit të Ministrave, vetëm nëse ka shprehur më parë vullnetin nëpërmjet një kërkese me shkrim. Sipas ligjit në fuqi, kur ndërtimi pa leje disponohet nga një subjekt, kontrata e kalimit të pronësisë së parcelës ndërtimore dhe objektit që legalizohet regjistrohen në emër të subjektit që disponon objektin. Ndërsa në rastin kur ndërtimi pa leje disponohet nga më shumë se një person fizik ose juridik, regjistrimi i pjesëve takuese mbi pasuritë ( parcelë dhe objekt) kryhet: në pjesë të pandara, ideale, sipas numrit të subjekteve; në pjesë takuese të ndara, sipas marrëveshjes së nënshkruar ndërmjet subjekteve lirisht dhe të depozituar brenda afatit të vetëdeklarimit. Subjektet mund të përcaktojnë përveç pjesës takuese edhe pjesët fizike respektive nëse ndërmjet tyre përputhet vullneti.