Të hënën Konferenca e Donatorëve, Rama: Nuk do të jetë simbolike, kam ndjesi të mirë
Kryeministri në Gjermani takon homologët e Kanadasë, Kuvajtit e Gjeorgjisë Trudeau: Jemi angazhuar për të ndihmuar Shqipërinë
Ditën e hënë do të zh villohet Konferenca e Donatorëve në Bruksel me qëllim për të ndihmuar Shqipërinë për procesin e rindërtimit pas tërmetit tragjik të 26 nëntorit të vitit të kaluar. Në axhendën e publikuar nga Komisioni Europian, konferenca e donatorëve do të nisë të hënën në Bruksel me nënshkrimin e fondit prej 15 milionë eurosh, që Komisioni ka vendosur në dispozicion të Shqipërisë për të përballuar kostot e tërmetit të 26 nëntorit. Në përfundim është parashikuar dhe një konferencë për shtyp e Presidentes së Komisionit Europian dhe Kryeministrit Rama. Kryeministri Edi Rama u shpreh se është optimist, nisur edhe nga ndjesia e mirë, se shuma nuk do të jetë thjesht simbolike. "Kemi këtë konferencën të hënën, të shohim se çfarë do të marrim, nuk është se presim të mbyllen të gjitha, por kemi punuar me kontakte me udhëtime, me takime edhe kemi një ndjesi të mirë, që nuk do të jetë diçka thjesht simbolike apo shumë nën pritshmëritë. Pritshmëria ime është që të kemi një mbështetje që të na japë mundësinë që bashkë me fondet që kemi vendosur vetë dhe nga dy ide të tjera që do i vendosim në lëvizje pas pak ta plotësojmë nevojën edhe ta shfrytëzojmë këtë moment, këtë plagë për ta bërë shumë më mirë dhe të fortë organizimin më pas. Ata që ikën nuk i kthejmë dot, por ata që u goditën t'u japim mundësi të hyjnë në një jetë të re dhe të gjithë do të kenë banesa më të mirë se ata që kishin. Kjo është sfida" - shprehet z. Rama. Fatura e dëmeve nga tërmeti është 985 milionë euro, ndërsa rindërtimi kërkon edhe rreth 90 milionë euro më shumë, që shkon në total rreth 1.08 miliardë euro.
LOBIMI
Kryeministri Edi Rama ndodhet në Gjermani ku po takohet me homologët ndërkombëtarë lidhur me konferencën e donatorëve që do të mbahet në datë 16 shkurt në Bruksel për rindërtimin e banesave të shembura nga tërmeti i 26 nëntorit. Veç vendeve europiane, në konferencën e donatorëve "Bashkë për Shqipërinë", që do të mbahet në Bruksel më 17 shkurt, pjesë do të jenë dhe Kanadaja dhe Kuvajti. Me kryeministrat e të dy këtyre vendeve, kreu i qeverisë shqiptare u takua në Mynih, ku do të marrë pjesë në Konferencën për Ballkanin Perëndimor: ' Perspektiva e anëtarësimit në BE dhe siguria rajonale'. Rama shprehu mirënjohjen për angazhimin e tyre në këtë konferencë. Kanadaja do të marrë pjesë në konferencën e donatorëve në Bruksel për të ndihmuar Shqipërinë për procesin e rindërtimit. Lajmin e konfirmoi vetë kryeministri kanadez gjatë takimit me homologun shqiptar Edi Rama në Mynih, të cilët marrin pjesë në konferencën e sigurisë. Trudeau u shpreh se Kanadaja është e angazhuar për të marrë pjesë në Konferencën e Rindërtimit. "Kënaqësi e vërtetë të ulem sërish me mikun tim, Edi Rama nga Shqipëria. Më jep mundësinë së pari, të shpreh edhe njëherë ngushëllimet e mia për tërmetin e tmerrshëm për të cilin folëm kur u takuam në NATO. Kanadaja është angazhuar për të marrë pjesë edhe në Konferencën e Rindërtimit, në shkurt. Kemi punuar shumë mirë bashkë në misionet e NATO- s. Shqiptarët po kryejnë shërbimin përkrah Kanadasë në Letoni për mision "Enhanced Forward Presence" dhe është kënaqësi të vazhdojmë të shkëmbejmë dhe të kemi një bashkëpunim kaq të mirë me ju, ndërsa ecim përpara",- tha ai. Ndërsa z. Rama i shprehu mirënjohjen për reagimin pas tragjedisë së tërmetit, duke shtuar se uron për forcimin e marrëdhënieve mes dy vendeve. "Jam shumë mirënjohës dhe e vlerësoj shumë takimin me ju në çdo rast. Ju e dini që keni një ndikim shumë të madh tek shumë nga homologët tuaj. Në të njëjtën kohë e dini që jeni edhe Kryeministër i shumë shqiptarëve që jetojnë në Kanada, punojnë shumë dhe kontribuojnë për vendin tuaj, por gjithashtu marrin shumë njohuri dhe të mira nga vendi juaj për familjet e tyre. Do të doja t'ju shpreh edhe mirënjohjen që treguat ndjeshmëri për ato që ndodhën kohët e fundit. Mirënjohës që do të jeni i pranishëm në konferencë. Duam t'i forcojmë marrëdhëniet. E di që jemi larg, por në një farë mënyre ndihemi shumë të afërt me vendin tuaj dhe të gjithë ju. Prandaj faleminderit për kohën dhe faleminderit që u ulët nga ana e flamurit shqiptar", u shpreh Rama. Kryeministri Rama po shfrytëzon Konferencën e Sigurisë në Mynih për të siguruar sa më shumë mbështetje për konferencën e donatorëve më 17 shkurt në Bruksel. Rama takoi në Mynih edhe homologun e tij nga Kuvajti Sabah Al Khalid Al Sabah. Në fokus të diskutimeve ishte rindërtimi pas tërmetit të 26 nëntorit dhe konferenca e donatorëve. "Gjermani, Mynih - Takim me Kryeministrin e Kuvajtit, Sabah Al Khalid Al Sabah, me fokus Rindërtimin dhe Konferencën e Donatorëve të hënën në Bruksel",- shkruan Rama. Pas homologëve të Kuvajtit dhe të Kanadasë, Rama takoi edhe kryeministrin gjeorgjian Giorgi Gakharia.