' Nuk kaloi vetingun', PD: Rama emëron bashkëshorten e Denar Bibës në administratë

PD

akuzoi dje kryeministrin Edi Rama se po përdor standard të dyfishtë në lidhje me pastrimin e sistemin e drejtësisë nga të korruptuarit. Në një deklaratë për mediat, ish- deputeti demokrat Klevis Balliu, tha se vendimi për t'i gjetur një punë në shtet bashkëshortes së nënkryetarit të Komisionit Qendror të Zgjedhjeve, Denar Biba, pasi ajo dështoi të kalojë vetingun, është një nga rastet më flagrante të këtij standardi. "E gjithë propaganda e Edi Ramës për gjoja pastrimin e sistemit të drejtësisë nga të korruptuarit rrëzohet nga një vendim i vetë qeverisë së Edi Ramës për të mbajtur në administratën e tij ata që nuk e kalojnë vetingun. Një nga rastet më flagrante të standardit të dyfishtë të Edi Ramës është vendimi për t'i gjetur një punë në shtet bashkëshortes së nënkryetarit të KQZ, Denar Biba, pasi ajo dështoi të kalojë vetingun. Këshilltarja e Gjykatës së Lartë, Elona Kana, u tërhoq nga sistemi i drejtësisë pak para daljes së vendimit të vetingut, sepse nuk justifkonte dot pasuritë e saj dhe të shërbëtorit të Ramës në KQZ. Por me një vendim qeverie këtë javë, Edi Rama e ka emëruar bashkëshorten e Denar Bibës në një post në Entin Rregullator të Ujit. Megjithëse nuk justifikoi pasurinë, megjithëse u tërhoq para se vetingu ta shkarkonte nga detyra e këshilltares në Gjykatën e Lartë, kamikazi i Edi Ramës në KQZ, i cili organizoi votime të paligjshme pa opozitën, u shpërblye",- tha z. Balliu. Sipas tij lufta kundër korrupsionit në dorën e kryeministrit është vetëm propagandë. Ai nënvizoi faktin që kreu i qeverisë hedh në kosh edhe një nga kushtet kyç të Bundestagut për hapjen e vërtetë të negociatave me Shqipërinë.