Projekti për Teatrin e ri Kombëtar, prokuroria rrëzon Partinë Demokratike për arkitektin danez
PD nuk "bindet" dhe anikimon vendimin, pritet vendimi i gjykatës "Nuk ka prova se Bjarke Ingels ka shkelur ligjin"
Prokuroria e Tiranës ka rrëzuar preten dimet e Partisë Demokratike se arkitekti danez Bjarke Ingels ka shkelur ligjin duke realizuar projektin për ndërtimin e teatrit të ri, pa patur një marrëveshje me autoritetet dhe duke qenë në dijeni të faktit se godina do të ngrihej në një zonë të mbrojtur. Në nëntor të vitit 2019, prokurori Saimir Hysa vendosi mosfillimin e procedimit penal, me argumentin se nuk ka element të veprës penale. Por, çështja përfundoi në gjykatë, përderisa Partia Demokratike e ankimoi vendimin e Akuzës, duke mos qenë dakord me të. Javët e ardhshme pritet që gjykata të kontrollojë vendimin e prokurorisë dhe të vendosë për mbylljen finale të çështjes, apo ta kthejë dosjen për rihetim. Opozita e kallëzoi arkitektin e huaj për akuzën e korrupsionit pasiv në sektorin privat, dhënie ndihme për ndërtim të paligjshëm dhe ushtrim i ndikimit ndaj personave që ushtrojnë funksione publike. Në dokument thuhet se arkitekti ka marrë përsipër realizimin e projektit në mënyrë private nga kryeministri dhe kryetari i Bashkisë së Tiranës. Realizimi i projektit thuhet në kallëzim, ka filluar në vitin 2016, pa nënshkruar një marrëveshje me autoritetet publike dhe zona ku ndodhet godina e teatrit konsiderohej zonë e mbrojtur. Në materialin kallëzues theksohet Ingels ka kryer vepër penale, për sa kohë ka pranuar të realizojë projektin e porositur nga autoritetet, të cilët nuk kanë zbatuar asnjë procedurë për paraqitjen e saj, pa pasur asnjë shprehje interesi apo njoftim publik. Por të gjitha pretendimet e opozitës janë rrëzuar nga prokurori Hysa, i cili thekson se pasi shqyrtoi kallëzimin, arrin në konkluzionin se nuk ka bazë ligjore, për fillimin e procedimit penal. Kjo për faktin se punimet për ndërtimin e teatrit të ri nuk kanë nisur dhe për rrjedhojë nuk rezulton që subjekti i kallëzuar të ketë ofruar shërbime. Lidhur me kërkesën për vendosjen e sekuestros paraprake ndaj projektit, prokuroria thotë se: "Nuk është në objektin e punës së prokurorisë të gjykojë mbi vlefshmërinë e akteve ligjore apo nënligjore të nxjerra nga organet shtetëror si dhe mbi faktin nëse duhet shembur ose jo godina e teatrit Kombëtar".
VENDIMI I PROKURORISË
"Arsyetimi se arkitekti danez ofertën apo përfitimin e parregullt të marrë nga ' Fusha' sh. p. k. ja ka kaluar kryeministrit dhe kryetarit të bashkisë është në kuadrin e hamendësimeve dhe e pambështetur në asnjë provë apo rrethanë serioze. Në rast se bëhet fjalë për vlerën e përfituar nga Bjarke Ingles si shpërblim për punën e kryer prej tij për realizimin e projektit, kjo nuk konsiderohet si përfitim i paligjshëm, pasi është një e ardhur që buron nga një punë e kryer realisht dhe të një marrëveshje mes porositësit të projektit cilido qoftë ai dhe arkitektit. Kallëzuesi nuk ka paraqitur asnjë provë konkrete apo indicie përveç deklaratave publike të bërë nga vetë personat që pretendon se ka kryer këtë vepër penale",- shkruhet në vendimin e prokurorisë së Tiranës.