"Analiza ' PCR në moment' nuk bëhet se nuk e parashikon PPP"
Shefi i kardiokirurgjisë lëshon alarmin: Kjo është çështje e sigurisë kombëtare Edvin Prifti: Të rishikohet koncensioni i padrejtë
Shefi i Kardiokirurgjisë në QSUT, Edvin Prifti, thekson se autoritetet duhet të mendojnë seriozisht se si duhet të përgjigjemi për koronavirusin, i cili ditën e sotme shënoi dy viktima në Itali.
Përmes një mesazhi në "Facebook", shkruan se kur ndodhemi përballë fataliteteve të mundshme, duhet një seriozitet i jashtëzakonshëm dhe profesionalizëm i çdo strukture. Sipas shefit të Kardiokirurgjisë, tre hapat që duhen ndjekur me urgjencë janë diagnostikimi në kohë rekord, karantina dhe trajtimi.
MESAZHI I PLOTË:
Vdekjet e para të shënuara në Itali nga infeksioni i koronavirusit na bëjnë të ndjehemi akoma edhe me afër ndaj ngjarjeve, të cilat mund të jenë shkatërrimtare për njerëzit dhe popullin tonë. Masat drakoniane që janë marrë në vendin e origjinës të këtij infeksioni viral dhe që po shoqërohen me masa akoma edhe me të ashpra në vendet pranë duhet të na bëjnë të mendojmë akoma edhe me seriozisht se si duhet të përgjigjemi në keto kushte. Mendoj që gjithmonë ka momente relaksi dhe llafesh, proklamatash, por kur ndodhemi përballë fataliteteve të mundshme duhet një seriozitet i jashtëzakonshem dhe profesionalizëm i çdo strukture.
E PARA DIAGNOSTIKIMI NË KOHË REKORD:
Dje po interesohesha dhe m'u tha nga një prej specialistëve tanë më të mirë të sëmundjeve infektive që real time PCR është kërkuar nga laboratori i mikrobiologjisë në QSUT dhe nuk është realizuar pasi PPP nuk e parashikon. Atëherë unë them që zotërinj- këtu ndodhemi përballë një çështje të sigurisë kombëtare. Unë nuk e di se ç'mund të konsiderohet tjetër gjë brenda nocionit të sigurisë kombëtare. Dhe në këto kushte dikush mund të ketë paturpësinë të ktheje një përgjigje të tillë. Nga ana tjetër ne si universitet na duket një gjë normale kjo?! Nëse kjo PPP reagon në këtë mënyrë atëherë pa dyshim që duhet rishikuar pasi është totalisht e padrejtë dhe aspak shkencore, bllokon hulumtimin që në pikënisje dhe rrezikon dhe cenon jetën. Kur i mohohet të vetmes qendër universitare hulumtimi dhe diagnostikimi?! Atëherë kush do ta bëjë? Dikushi me tha se mund të diagnostikohet në Institutin e Shëndetit Publik. Kjo është gjë shumë e mirë, po si mund të mohohet diagnostikimi në QSUT.
E DYTA: KARANTINA
Asgjë nga fronti i lindjes. Nuk dimë se si, ku, në ç'kushte. Mos na duket çudi, pasi mund të jetë secili prej nesh kandidat për në karantinë dhe mendoj që njerëzit duhet të jenë në dijeni të gjithçkaje.
E TRETA: TRAJTIMI
Këta të sëmurë në fund të tyre kanë nevojë për ventilim mekanik të drejtuar ose oksigjenim artificial. Për sa i përket ventilimit mekanik, në Shqipëri ne kemi vetëm 140 ventilatorë mekanike, këtu përfshirë edhe strukturat private që do të thotë, që sikur t'ia mohojmë ventilimin mekanik gjithë të sëmurëve të tjerë atëherë vendi ynë mund të trajtojë vetëm 140 të sëmurë njëkohësisht. Oksigjenimi artificial që ka të bëjë me një aparat tjetër që quhet Extracorporeal membrane oxygenator ose ECMO, të cilin kemi vite që e kërkojmë me ngulm në kardiokirurgji, por sidomos pas epidemisë së H1N1 si e vetmja alternativë për të mbajtur në jetë këta të sëmurë, nuk ka asnjë aparat të tillë në Shqipëri.
Afërsia me Lombardinë, shkëmbimet në njerëz dhe mallra me Italinë na shtyn që duhet menduar seriozisht për përballjen me koronavirusin. Nuk mund të sillemi sikur është një gjë larg nesh. Çdo njeri prej nesh, politikanë, biznesmenë, ambasadorë, ministra dhe deputetë, por veçanërisht personeli shëndetësor mund të jenë të infektuarit e radhës. Nga 29 të infektuar në Itali, 5 janë personel shëndetësor. Domine Quo Vadis?!