Meta: T'a kthejmë 2 marsin në një referendum madhështor të sovranit
"Do jem aty", Neritan Liçaj konfirmon pjesëmarrjen, presidenti: Pres çdo artist "Bëjnë si tigra, por janë vetëm minj para popullit"
Presidenti i Republikës, Ilir Meta, i është përgjigjur një komenti të aktorit të njohur Neritan Liçaj, i cili konfirmon pjesëmarrjen në protestën e thirrur në 2 mars. Meta falënderon aktorin dhe shprehet se i pret të gjithë artistët heronj dhe patriotë në 2 mars, në mbrojtje të Kushtetutës. Kreu i shtetit në përgjigje të komentit të aktorit Neritan Liçaj, iu është drejtuar artistëve që në 2 mars të mblidhen në bulevardin "Dëshmorët e Kombit", në mbrojtje të Kushtetutës. "Faleminderit i dashur Neritan! Ju pres me shumë kënaqësi, jo vetëm ju personalisht, por të gjithë artistët heronj dhe patriotë, në 2 mars në mbrojtje të Kushtetutës dhe Gjykatës Kushtetuese. Nëse organizata mafioze rrëmben në mënyrë antikushtetuse Gjykatën Kushtetuese, ata do zhdukin jo vetëm teatrin, por çdo trashëgimi kulturore e kombëtare për llogari të disa oligarkëve dhe organizatës ndërkombëtare", - shprehet z. Meta në "Facebook". Duke iu referuar ish- aleatit të tij, presidenti nënvizon se i njeh mirë ata që po organizojnë grushtin e shtetit, por kërkon t'u hapë sytë shqiptarëve që të mbrojnë demokracinë në një moment vendimtar për vendin. "Të rivendosim plotësisht rendin kushtetues dhe demokratik, siç e ka shprehur vullnetin e tij populli shqiptar me referendum në 22 nëntor 1998. Ndaj, ta kthejmë 2 marsin në një referendum madhështor të triumfit të sovranit ndaj puçistëve dhe tradhtarëve kudo qofshin. Presidenti i njeh prej kohësh, por tani fytyrat e tyre hipokrite po i zbulojnë të gjithë shqiptarët. Bëjnë si tigra për të frikësuar njerëzit e thjeshtë, por janë vetëm minj përpara popullit shqiptar dhe drejtësisë që do të vijë", - thekson kreu i shtetit. Presidenti i Republikës, Ilir Meta, po përdor komunikimet me gazetarët dhe rrjetet sociale për të kërkuar mbështetjen e qytetarëve për besëlidhjen e re të 2 marsit, siç ai e ka quajtur. Prej ditësh
Ilir Meta ka publikuar fakte që sipas tij vërtetojnë se mazhoranca synon kapjen e Gjykatës Kushtetuese, duke luftuar institucionin e Presidentit. Dy ditë më parë Presidenti Ilir Meta shpërndau në "Twitter", reagimet e këshilltarit ekonomik pranë CDU- së, Martin Henz, i cili vë alarmin për gjendjen, sipas tij, ku ndodhet vendi ynë. Sipas Henz, mosfunksionimi i gjykatave krijon një emergjencë shtetërore në Shqipëri, ndërsa reagoi ashpër edhe ndaj ministres së Drejtësisë, Etlida Gjonaj, për të cilën shkruan se ka shkelur Kushtetutën. "Si evropianë, kemi një problem në rritje me ministren e Drejtësisë Etilda Gjonaj, e cila mban përgjegjësinë politike për shkeljen e përhershme të Kushtetutës shqiptare. Një sjellje masive, e dënueshme, antikonstitucionale. Një sjellje e papranueshme. Kjo është me të vërtetë pengim i drejtësisë dhe një sulm ndaj shtetit shqiptar. Asaj i mungon një kuptim i sundimit të ligjit, ajo duket se nuk e ka mësuar ligjin kushtetues në universitet. Mosfunksionimi i gjykatave, kaosi antikushtetues në pushtimin e gjykatave për shkak të destabilizimit absolut të ekonomisë, emigrimi i të rinjve të Shqipërisë krijon një emergjencë shtetërore. Mungesa e respektit, deklaratat fyese nga e ashtuquajtura ministrja e Drejtësisë, Etilda Gjonaj ndaj Presidentit Meta, i cili ndërhyri në pavarësinë gjyqësore janë probleme të tjera ligjore. Ajo tregon mospërfillje të plotë për rendin juridik dhe shtetëror. Kjo merr një dimension gjithnjë e më të madh antidemokratik. Kombi shqiptar duhet të reagojë në kuptimin e një demokracie të fortifikuar shqiptare dhe të mbrojë shtetin e saj nga ky shkatërrim. Paratë e taksave evropiane për reformën gjyqësore janë tretur", - u shpreh eksperti gjerman.