"Kërcënim potencial", Rama: Nuk jemi prekur nga koronavirusi
"Gati t'a përballojmë. Mendje të shthurura, në veprim"
Kryeministri Edi Rama mohon që Shqipëria të jetë prekur nga koronavirusi, por ai siguron se pavarësisht kërcënimit potencial, qeveria është gati ta përballojë atë me profesionalizëm. Pas aludimeve për prezencën e personave të infektuar me koronavirus edhe në Shqipëri, dje publikoi qëndrimin zyrtar të Ministrisë së Shëndetësisë mbi koronavirusin dhe masat që ka marrë vendi ynë. Për kryeministrin Rama, vendi ynë nuk ka asnjë person të prekur me këtë virus, por ai shton se si për gjithë botën, edhe për Shqipërinë është një kërcënim potencial. "Koronavirusi nuk e ka prekur Shqipërinë, por si për të gjithë botën është një kërcënim potencial, për të cilin janë marrë të gjitha masat në rast se do të na duhet ta përballim. Të njëjtat mendje të shthurura, që ju shqetësuan keq më me lajmet fallto dhe me gojëligësinë e tyre gjatë ditëve e netëve të gjata pas tërmetit, janë në veprim. Mos bini pre e tyre dhe jini të sigurt se shteti shqiptar po e bën prej kohësh detyrën për të qenë gati në rast shfaqjeje të koronavirusit, të cilin jemi gati ta përballim me organizim e profesionalizëm të lartë", - shprehet z. Rama. Shqipëria dyfishoi personelin e njësive shëndetësore në pikat kufitare në përpjekje për të forcuar kontrollet e udhëtarëve, që vijnë nga vendet e prekura prej koronavirusit. Masat shëndetësore u shtuan në portet detare, aeroportet dhe pikat tokësore të Shqipërisë pas lajmeve mbi praninë e koronavirusit në Italinë fqinje.
THIRRJA
Më herët lideri i opozitës, Lulzim Basha, i bëri dje thirrje qeverisë dhe autoriteteve shëndetësore të marrin masa serioze dhe të nisin kontrollet në pikat kufitare për koronavirusin. Pas përhapjes me shpejtësi të epidemisë së koronavirusit në Italinë fqinje, kreu i opozitës, Lulzim Basha, i kërkon qever
isë shqiptare të marrë masa serioze dhe të menjëhershme. "Për fat të keq në Italinë fqinje janë shënuar viktimat e para nga koronavirus, ndërkohë që po rritet numri i të prekurve prej tij. I kërkoj qeverisë të marrë masa serioze dhe të menjëhershme", - theksoi kreu i opozitës. Z. Basha u bën thirrje autoriteteve shëndetësore të nisin kontrollet në
pikat kufitare. "Çdo pikë kontrolli kufitar dhe qendër shëndetësore të pajiset pa asnjë vonesë me personelin dhe aparatet e duhura për të evidentuar dhe trajtuar në kohë çdo rast të mundshëm", - theksoi z. Lulzim Basha. Qeveria ka ngritur një ekip të posaçëm për parandalimin, kontrollin dhe mbrojtjen e popullatës ndaj koronavirusit të ri.
PETRIT VASILI
"Shqipëria, zero raste nga koronavirusi. Asnjë shenjë e pandemisë në Shqipëri. Asnjë arsye për alarm. Ndjekja e këshillave të mjekeve dhe të Institutit të Shëndetit Publik, të mjaftueshme për të vazhduar me qetësi përditshmërinë tonë. Të mos ulet aspak vëmendja për gripin stinor, i cili paraqet probleme tepër të rëndësishme që duhen vlerësuar seriozisht", - tha nënkryetari i LSI- së.
Ekspertët dhe drejtuesit e institucioneve shëndetësore vendosën mbledhjen e djeshme përforcimin e masave në pikat kufitare për të gjurmuar raste të mundshme të koronavirusit. Ata kërkuan shtimin e mjeteve mbrojtëse personale, spitalore, laboratorike dhe shtimin e kontrolleve për të parandaluar depërtimin e koronavirusit në Shqipëri.