Koronavirusi shkakton 2442 të vdekur në Kinë, 76.936 raste të infektuara

Raste të reja në Korenë e Jugut dhe Iran

Bilanci

i koronavirusit në Kinë arriti 2442 të vdekur, pas 97 viktimave të regjistruara, pothuajse të gjitha në provincën Hubei. Komisioni Kombëtar i Shëndetësisë ka konfirmuar edhe 648 raste të reja pozitive. Pjesa më e madhe e të vdekurve nga infeksioni janë regjistruar në Wuhan, ku virusi u shfaq për herë të parë në dhjetor. Totali i të infektuarve në Kinë ka arritur 76.936 raste. Koronavirusi i ri e ka origjinën në provincën kineze Hubei vitin e kaluar, por është përhapur në 26 vende. Kina ka raportuar rënie të numrit të viktimave nga koronavirusi të shtunën, por ky virus ka shënuar rritje në Korenë Jugore si dhe 10 raste të reja janë paraqitur në Iran. Në këtë vend si pasojë e koronavirusit kane vdekur tetë veta, duke bërë që Turqia të mbyllë kufirin me Iranin. Drejtori i OBSH- së, Tedros tha përmes "Twitter"- it tha se rastet që nuk janë të lidhura me Kinën janë shqetësuese si dhe bëri thirrje nga të gjitha vendet për gatishmëri. Sakaq, presidenti kinez Xi Jinping, falënderoi personalisht miliarderin amerikan Bill Gates, pasi ky i fundit dhuroi 100 milionë dollarë për të luftuar Covid- 19, raportuan mediat shtetërore. Mes fundit të janarit dhe fillimit të shkurtit fondacioni i Bill Gates premtoi shumën nëntë shifrore lidhur me përpjekjet për zbulimin e koronavirusit, sigurimin e mbrojtjes së popullatave në rrezik, zhvillimin e një vaksine, si dhe për trajtim. Sipas agjencisë lokale të lajmeve, në letrën drejtuar Gates, Xi shkroi se e vlerësonte dhurimin dhe letrën e solidaritetit drejtuar popullit kinez në një moment aq të rëndësishëm. Xi falënderoi gjithashtu fondacionin për bashkëpunimin e shpejtë me institucionet kineze pas shpërthimit të virusit.