Prezantohet Orges Shehi: Nuk kam frikë nga shkarkimi!
Ish- portieri i Skënderbeut në aventurën e tij të dytë në karrierë si trajner Kukësi tashmë me një timonier të ri, titulli kampion është kusht!
Orges Shehi është pre zantuar ditën e djeshme si trajneri i ri i Kukësit. Ish- portieri rikthehet kështu në krye të një klubi pas eksperiencës me Skënderbeun në sezonin e kaluar. Tashmë, detyra e durrsakut është të nxjerrë kampion Kukësin, teksa merr ekipin e lënë nga Duro me katër pikë diferencë nga kreu që mbahet nga Tirana. Në prezantimin e tij, Shehi ka theksuar se e zgjodhi Kukësin për arsye se është një skuadër e madhe, ndërsa shprehet i bindur se mund të dalë kampion. Ndërkohë, Shehi thekson se do të marrë opinione edhe nga Shpëtim Duro.
DREJTIMI I KUKËSIT
"Suksesi është i rëndësishëm për një trajner. E zgjodha Kukësin, sepse është një skuadër e madhe. Është arritje personale. Me shtyu cilësia e klubit dhe lojtarit. Është e rëndësishme të kesh grupin. Kam qenë pa skuadër këto kohë, isha si analist në një studio dhe e kam ndjekur Kukësin".
PRESIONI PËR TITULLIN
"Normal ku ka pritshmëri, ka presion. Duhet të jetë pozitiv presioni. Unë jam i bindur që mund të dalë kampion. Ka diference kur i shikon gjërat nga jashtë.
Nuk ka probleme të mëdha, por vetëm një ngërç psikologjik prej mënyrës se si i kanë lënë pikët në ndeshjet e fundit. Pasnesër kemi ndeshje, nuk ndryshoj dot shumë gjëra. Do punoj në aspektin psikologjik. Duhet të kuptojnë lojtarët që janë më të mirët dhe këtë do ua them shpesh. Titulli është i arritshëm, duke parë grupin e lojtarëve. Nuk do i shohim kundërshtarët. Nëse në i fitojmë krejt ndeshjet dhe ata nuk ndalen, u japim dorën. Duhet të shohim përpara, Tirana është në vend të parë. Gjithsesi ne do të shohim vetëm ndeshjen e radhës. Që sot kam në dorë listën dhe çfarë kam parë të gjithë kanë luajtur. I meshoj asaj që kemi ngërç psikologjik dhe të heqin mendimin se ndëshkohen në fund".
RELATA ME ISHTRAJNERIN DURO
"Kam marrëdhënie të afërt dhe kemi pasur komunikim. Nuk kam folur me të, ishte një lëvizje rrufe. Do i marr opinione, i kam marrë edhe më parë. Në një vend që kërkohet të fitohet, sigurisht nuk tolerohen humbjet. Të mendojnë pozitivisht, është dita ime e parë këtu. Plani im është të punoj me ata lojtarë dhe t'i quaj shokë e vëllezër. Vetëm bashkë i kalojmë këto situata dhe të kthehemi te fitorja. Kam bërë një pakt me veten: do bëj maksimumin. Është për t'u përgëzuar që Gjici u beson të rinjve. Uroj të dal edhe unë i suksesshëm. Kam drejtuar lojtarë që kanë dalë shumë vite kampion".
RREZIKU NGA SHKARKIMI
"Është prezent kudo, edhe kur dalin jashtë na rrezikon ndonjë makinë. Nuk u trembem sfidave dhe shpresoj ta kaloj".