NJË UNIFIKIM NË KOMISIONE TË PËRBASHKËTA

Elementi më identifikues dhe më unifikues i një kombi është gjuha. Edhe mes shqiptarëve, pavarësisht shteteve ku jetojnë, përreth Shqipërisë a në Europë ka qenë gjuha elementi më i dukshëm identitar, duke kërkuar rrënjët dhe identitetin deri tek arvanitët, arbëreshët apo arbneshët. Duke pasur parasysh pikërisht këtë risi, Akademitë e Prishtinës e Tiranës patën krijuar një këshill ndërakademik të gjuhës, që për shkak të reformës së Akademisë së Tiranës i pat pezulluar punimet.

Katër vite pas pushimit të mbledhjeve të rregullta, pritet të rinisë punën Këshilli Ndërakademik i Gjuhës Shqipe. Këshilli mbledh gjuhëtarë me status akademik nga Shqipëria, Kosova, Mali i Zi dhe Maqedonia e Veriut për të folur mbi përdorimin dhe keqpërdorimin e shqipes standarde, ligjërimit publik dhe dokumenteve zyrtare e njëherësh për të këshilluar institucionet shkollore e administrative. Rinisja e punimeve është propozuar nga kryetari i Akademisë së Shkencave dhe e Arteve e Kosovës, Mehmet Kraja. Ai tha se qëllimi kryesor është rregullimi shkencor e ligjor i përdorimit të shqipes në funksione publike e zyrtare. “Një numër i anëtarëve të këshillit nuk jetojnë më. Do të plotësojmë vendet e tyre dhe do të rindërtohet. Këshilli do të përbëhet nga 7 gjuhëtarë nga Shqipëria, 7 nga Kosova dhe një nga Maqedonia e Veriut. Do të rivihet në punë dhe do të plotësojë rregulloren e punës. Janë shtatë nga Kosova, shtatë nga Shqipëria dhe një nga Maqedonia, të tjerat janë çështjet e gjuhëtarëve se kush do ta përfaqësojë”, tha Kraja.