GREG RAMA ME “EX NIHILO”, IMAZHE TË NGURTA QË RRËSHQASIN
Është
çelur në galerinë “FAB” të Uni versitetit të Arteve ekspozita “Ex Nihilo” e artistit Greg Rama, i njohur për publikun e gjerë si djali i kryeministrit të vendit.
Kuratori Ardian Isufi shënon në konceptin e tij kuratorial se “Fijebari - Përcjellës të një zgjatimi ëndërrtar pa fillim e pa mbarim si metaforë e krijimit nga jo- materialja, nga hiçi [ latinisht ex nihilo], ku ‘ Arti synon t’i japë formë dhe peshë proceseve më të padukshme… t’i japë formë asaj që po zhduket përpara syve tanë. Jo dhe aq si objekte, sepse kjo do të thotë të biem në kurthin e sendërtimit, por si instrumente përvoje”.
Për bulën e ujit – ai shënon se materia e tejdukshme delikate vjen edhe si formë tranzitore e materies shpirtërore. Situatë e një përjetimi të përkohshëm, njëfarë “arti i ikjes nga koha, i pa bindur ndaj çfarëdo lloj fiksimi”.
Në “Ex Nihilo”, instalacioni dhe hapësira në të cilën instalacioni merr jetë janë rrëfimtarë të përbashkët të një ngjarjeje të papërcaktuar dhe procesuale duke e futur qenien njerëzore, sidomos publikun fizik, në paradhoma dhe dhoma simulakre, për t’i shumëfishuar psikologjikisht ngjarjet, ndarjet dhe nëntekstet në hapësira mentale dhe shpirtërore.
Të tri dhomat në të cilat shtrihet ‘ Ex Nihilo’ janë vizatuar me linja drite imagjinare dhe prezantojnë një triptik kinematik. Brenda tij spektatori kthehet në personazhin kryesor, në ingranazhin vendimtar që plotëson veprën përfundimisht dhe shëtit kujtesën personale nga një territor në tjetrin në një botë çudirash, duke ndjekur në mënyrë intensive indet e errëta jeshilore. Imazhe të ngurta që i rrëshqasin para syve. Spektatorit i zbulohet pak nga pak, me një qartësi organike, bashkë me ca të vërteta të tjera, se kur të dalë nga hojet ekspozitive bota do t’i riprezantohet ndryshe, thuajse ex nihilo.