"Dezinfektim të autobusëve dhe rrugëve, mbyllje e konvikteve deri në 3 prill"
Veliaj prezanton masat e Bashkisë së Tiranës
Bashkia
e Tiranës ka mar rë një sërë masash, me qëllim për të përballuar përhapjen e koronavirusit në kryeqytet. Kryebashkiaku Erion Veliaj prezantoi një sërë vendimesh të rëndësishme, duke filluar që nga ato me shkollat e gjer te transporti publik dhe te celebrimi apo ceremonitë mortore. "Kemi filluar sot të marrim disa masa sa i takon transportit publik. Kemi filluar dezinfektimin e rrugëve dhe të autobusëve. Megjithatë, më lejoni të sqaroj diçka, nuk infekton rruga apo autobusi njeriun. Infekton njeriu njeriun. Kështu që këshilla që dha kryeministri për higjienë personale janë ABC- ja e rezistencës ndaj kësaj sfide që na ka ardhur në Tiranë. Megjithatë, ne po bëjmë dezinfektimin e rrugëve, dezinfektimin e autobusëve, por mënyra më e mirë është të ecim ose të ngasim biçikletën", tha ai. Duke u ndalur te konviktet, kryebashkiaku Veliaj lajmëroi pezullimin e përkohshëm të konvikteve gjer në rifillimin e mësimit. "U kërkoj drejtoreshave të konvikteve të komunikojnë që konviktet nuk do të funksionojnë. Pra, do të aplikojnë udhëzimin e qeverisë dhe urdhrin e Bashkisë së Tiranës për të qenë zona të zbrazura deri në datën 3 prill. Ndaj, dua që të gjitha drejtoreshat tona të konvikteve të bëjnë njoftimet përkatëse", deklaroi ai. Kreu i bashkisë u shpreh se masa të forta do të merren edhe për celebrimet, ku përveç çiftit dhe dëshmitarëve të nevojshëm që kërkon ligji, nuk do të lejohen të tjerët. Lidhur me ceremonitë mortore, Veliaj kërkoi mirëkuptimin e qytetarëve për kufizime, veçanërisht të ritit të dhënies së dorës.