Masat ndaj koronavirusit, ngrihen 2 dhoma karantinë në spitalin e Fierit dhe shpërndahen 22 mijë maska
Frika, qytetarët e Durrësit dynden nëpër supermarkete. Shtohen kontrollet në pikat kufitare Masat në Shkodër e Kukës, dezinfektohen mjetet e transportit publik. Anulohen festimet për Ditën e Verës në Elbasan
Zyrtarizimi i dy rasteve me koronavirus në orët e para të mëngjesit të djeshëm ka bërë që në pikat doganore të vendit tonë të intensifikohen kontrollet e personave që hyjnë, nëse janë bartës të virusit Covid- 19. Edhe në doganën e Bllatës janë rritur kontrollet ku ato bëhet njëherësh për disa persona që hyjnë nga shteti fqinj i Maqedonisë së Veriut. Drejtori i Njësisë Vendore të Shërbimit Shëndetësor Dibër, Hasan Manja tha dje se tashmë puna e grupeve të mjekëve të dislokuar aty është më intensive pas shfaqjes së rasteve tashmë edhe në vendin tonë. Ai shtoi se kontrollove tani iu nënshtrohen të gjithë personat që hyjnë, ndryshe nga më parë që kontrolloheshin vetëm të huajt. Manja tha se deri tani nuk ka pasur asnjë rast të dyshimtë të të prekurve me koronavirus ndërsa janë hapur karantina në doganën e Bllatës dhe në Dibër. Kontrollet janë shtuar dhe në pikat kufitare të Hanit të Hotit, Muriqan, Kapshticë dhe Kakavijë. Disa prej personave që kanë hyrë në Kapshticë ditën e djeshme janë shprehur për kamerën se në shteti fqinj nuk janë kontrolluar. Ndërkohë, mbërritja e koronavirusit në Shqipëri, i konfirmuar mbrëmjen e së dielës te dy pacientë, babë e bir, ka alarmuar qytetarët. Ditën e djeshme, qytetarët janë dyndur nëpër supermarkete për të blerë ushqime, nëse do duhet të mbyllen nëpër shtëpi, në rast të përhapje së mëtejshme të sëmundjes. "Gazeta Shqiptare" ka siguruar video që tregojnë se në qytetin e Durrësit qytetarë të shumtë janë dyndur dyerve të supermarketeve, duke blerë ushqime.
MASAT NË SHKODËR
Pas urdhrit të Ministrisë së Arsimit, Bashkia e Shkodrës ka pezulluar mësimin dhe çdo aktivitet. Shkollat dhe kopshtet janë mbyllur deri në një moment të dytë, ndërkohë që mësuesit do vijojnë të paraqiten në punë për të monitoruar situatën dhe për të mbikëqyrur higjienën.
"Bashkia e Shkodrës, në kuadër të masave të marra për përballimin e situatës së krijuar nga shfaqja e rasteve të para nga koronavirusi në Shqipëri, në mbështetje të urdhrave nga dikasteret qendrore, bën me dije se: 1. Duke filluar nga dita e sotme, pezullohet mësimi dhe çdo aktivitet: - Në institucione publike dhe jo publike të tilla si: aktivitete sportive, aktivitete kulturore dhe konferenca, tubime dhe takime me pjesëmarrje masive në vende të mbyllura apo të hapura, p. sh. koncerte, tubime dhe dëgjesa publike.
- Në shkolla, kopshte dhe çerdhe dhe qendra në territorin e Bashkisë së Shkodrës, deri në një njoftim të dytë.
2. Stafet e këtyre institucioneve, do të vazhdojnë të paraqiten në detyrë, duke pasur si prioritet monitorimin e situatës dhe mbikëqyrjen e higjienës dhe pastërtisë së ambienteve, në zbatim të orientimeve të OBSH- së. 3. Duke nisur nga dita e nesërme, do të vijojë dizinfektimi i të gjitha institucioneve publike, shkolla, kopshte e çerdhe, qendra në territorin e Bashkisë Shkodër.
4. Banorët në territor, udhëzohen të zbatojnë të gjitha urdhrat e protokollet publike tashmë të institucioneve vendase e të huaja, për përballimin me sa më pak pasoja të situatës, duke shmangur panikun dhe ruajtur qetësinë. Bashkia e Shkodrës do të jetë në shërbim të banorëve në territor për t'i orientuar për çdo nevojë që ata mund të kenë", njoftoi Bashkia e Shkodrës.
MASAT NË KUKËS
Bashkia Kukës ka ndaluar të gjitha aktivitet që parashikohet të kenë fluks personash deri në datë 3 prill. Gjithashtu, pas urdhrit të Ministrisë së Arsimit, janë mbyllur të gjitha kopshtet dhe çerdhet si dhe janë marrë masa për dezinfektimin e tyre, por edhe të mjeteve të transportit publik. "Sot u mblodh Këshilli i Sigurisë Vendore, ku u vendos të merren masa të menjëhershme për mbylljen e institucioneve vendore arsimore si kopshte dhe çerdhe si dhe, gjithashtu, për dezinfektimin e te gjitha kopshteve dhe çerdheve. Janë të ndaluara deri me datë 3 prill, të gjitha tubimet, takimet dhe aktivitetet e tjera që kanë fluks personash. Drejtoria Shërbimeve pranë Bashkisë Kukës ka marrë masat për dezinfektimin e të gjithë ambienteve dhe institucioneve publike, por, si dhe mjetet e transportit publik siç janë autobusët dhe furgonat që vijnë nga Tirana si dhe qytete të tjera. Eshtë vendosur një linjë e mirë koordinuar mes te gjithë institucioneve për marrjen e të gjithë masave të duhura për parandalimin dhe trajtimin e kësaj situate", thuhet në njoftimin e kësaj bashkie.
MASAT NË ELBASAN
Bashkia e Elbasanit ka ndërmarrë një sërë masash pas konfirmimit të dy rasteve me koronavirus në Shqipëri, mes tyre edhe anulimin e të gjitha aktiviteteve për ditën e verës, mbyllja e kopshteve, shkollave dhe qendrave kulturore. "Bazuar në urdhrin e Min
istrisë së Shëndetësisë nr. 135, datë 09.03.2020 të gjitha institucionet arsimore publike dhe jo publike do të mbyllen për një periudhë dy javore për të parandaluar përhapjen e coronavirusit. Po ashtu janë pezulluar deri në 3 prill të gjitha aktivitetet kulturore e sportive. Nisur nga kjo situatë, Bashkia e Elbasanit njofton pezullimin e të gjithë aktiviteteve me rastin e Ditës së Verës. Për të evituar grumbullimet dhe për të mbrojtur shëndetin e qytetarëve, festimet do të pezullohen, por elbasanasit do ta festojnë festën e tyre tradicionale pranë familjeve. Në kuadër të masave të mëtejshme mbrojtëse, Bashkia e Elbasanit bën me dije se nga nesër nis dezinfektimi i të gjitha ambienteve të institucioneve arsimore, në mënyrë që ato të jenë të gatshme për rifillimin e procesit arsimor. Me urdhër të Kryetarit të Bashkisë do të nisë menjëherë dezinfektimi i kontenierëve të mbeturinave në qytet e fshat. Po ashtu, do të qëndrojnë të mbyllura deri në datë 3 Prill, Qendra Kulturore e fëmijëve, Teatri "Skampa" dhe Qendra Komunitare rome. Bashkia e Elbasanit garanton qytetarët për cilësinë e ujit të pijshëm. Uji i pijshëm garanton të gjitha standardet për konsum, janë marrë të gjitha masat për cilësinë e tij. Analizat e ujit të pijshëm janë të përditshme
dhe të çertifikuara". Bashkia e Elbasanit do të ketë komunikime të vazhdueshme me qytetarët për çdo masë të marrë në vijimësi, përmes rrjeteve sociale, faqes zyrtare dhe mediave lokale. Bashkia e Elbasanit do të krijojë lehtësira për punonjësit e saj që kanë fëmijë të vegjël për t'u kujdesur. Të dashur qytetarë, kjo nuk është situatë për panik, por një situatë për t'u kujdesur më shumë për shëndetin dhe higjienën personale. Mos neglizhoni këshillat e publikuara nga Ministria e Shëndetësisë. Për çdo simptomë, të ngjashme me ato të coronavirus telefononi numrin 127.0", thuhet në njoftimin e bashkisë së Elbasanit.
DYNDJA NË SUPERMARKETE
Mbërritja e koronavirusit në Shqipëri, i konfirmuar mbrëmjen e së dielës te dy pacientë, babë e bir, ka alarmuar qytetarët. Ditën e djeshme qytetarët e Durrësit janë dyndur nëpër supermarkete për të blerë ushqime, nëse do duhet të mbyllen nëpër shtëpi, në rast të përhapje së mëtejshme të sëmundjes.
MASAT NË FIER
Kur në vendin tonë janë regjistruar dy raste me koronavirus, autoritetet shëndetësore kanë ndërmarrë një sërë masash për t'ju paraprirë precipitimit të situatës. Mësohet se spitali i Fierit ka ndërmarrë një sërë masash shtesë, ndërsa ka krijuar dy dhoma karantinë. Këto dhoma janë vendosur në repartin infektiv. Ndërkohë, Kuçi pohon ndër të tjera se janë shpërndarë 22 mijë copë masa si dhe pajisje me sasitë e nevojshme të oksigjenit. Po ashtu bëhet e ditur se personat që vijnë nga zonat e kuqe, u merret mostra dhe nëse dalin pozitiv do të dërgohen në Tiranë.