Amnistia, Denaj: Ja kush përfiton, skema e deklarimit dhe verifikimit
Ministria e Financave zbardh skemën e amnistisë së parave dhe pronave Propozimi i qeverisë, falen individët dhe bizneset
Ministrja e Finan cave Anila Denaj ka shpjeguar skemën se si do aplikohet amnistia fiskale, nga e cila do të përfitojnë individët dhe bizneset. Personat që kanë punuar në të zezë brenda dhe jashtë vendit dhe bizneset që kanë fshehur të ardhurat do të amnistohen. Të dy grupet kur të deklarojnë pasuritë duhet të deklarojnë edhe burimin. Kjo është në mënyrë të përmbledhur skema që do të ndjekë qeveria për amnistinë fiskale. Ministrja e Financave dhe Ekonomisë Anlia Denaj shpjegoi dje gjatë një interviste në OraNews kategoritë që përfitojnë. "Duam të diferencojmë dy raste. Pasuria e fshehur vjen nga dy grupe dhe grupet janë biznes dhe individ. Për të dy këto grupe ka dy prapavija, ajo që niset nga informaliteti dhe ajo që niset për të stimuluar një qarkullim paraje që shkon përtej informalitetit, shkon për të pastruar para që vijnë nga aktivitet të jashtëligjshme. Për këtë të fundit ka ligje që po funksionojnë, siç është paketa anti ' KÇK', e cila është e synuar për një pjesë të rëndësishme. Duhej nisur nga ata që kanë fshehur pasurinë pa dashje. Po flasim për një grup tjetër që janë ata që e kanë krijuar pasurinë në mënyrë të ligjshme, në atë që quhet ekonomi gri, siç mund të jetë puna në të zezë brenda dhe jashtë vendit, apo biznese që në vite nuk kanë deklaruar të gjitha të dhënat e pasqyrave të tyre financiare për të mos paguar taksa. Ky evazion jo domosdoshmërish nuk mund të konsiderohet i njëjtë me të parin. Duhen diferencuar dhe masat ndaj këtyre dy elementëve dhe grupet janë të ndryshme. Për të parën ka nisur sekuestrim dhe konfiskim për të dytën po shqyrtohet një amnisti, e cila për një periudhë të caktuar kohe do t'u japi mundësi këtyre individëve të deklarojnë pasuritë që kanë krijuar, formën si e kanë krijuar dhe më pas kryqëzimit të fakteve kjo pasuri të formalizohet",tha Denaj
SKEMA
Bizneset apo individët që kanë fshehur taksat mund t'i deklarojnë ato duke paguar një tatim që shkon nga 3 deri në 5 për qind e shumës së fshehur. Qeveria po bën gati draftin e amnistisë fiskale, e cili do të votohet shumë shpejt në parlament. Sipas projektit, bizneset do të kenë mundësi të legalizojnë fitimet e fshehura në vite, ndërsa qytetarët të ardhurat nga puna informale. Por amnistia përjashton të ardhurat nga korrupsioni i zyrtarëve dhe paratë e gjeneruara nga aktivitetet kriminale si trafiku, prostitucioni apo veprat e tjera që parashikohen në paketën anti KÇK. Megjithatë mënyra se si qeveria do të garantojë që paratë e krimit të mos ligjërohen përmes amnistisë mbetet për t'u parë. Qeveria siguron se bizneset apo individët që do të deklarojnë të ardhurat e fshehura, të cilat nuk kanë burim aktivitetet kriminale nuk do të ndiqen penalisht. Kryeministri theksoi kur prezantoi nismën se përjashtohen kategorikisht paratë që vijnë nga krimi, si dhe të politikanëve me familjet e tyre, gjyqtarëve me familjet e tyre, prokurorëve dhe familjeve të tyre punonjësve të policisë dhe kryetarëve të bashkive me familjet e tyre. "Këta nuk do të kenë shansin të përfitojnë nga amnistia për të pastruar para që vijnë nga korrupsioni. Gjithë të tjerët do të ftohen të fusin paratë në banka dhe do të kenë garanci të plotë se askush, asnjëherë nuk do kthehet mbrapa veç në rastin kur rezultojnë para politikanësh apo krimi",- tha Rama.