Koronavirusi, Jaço: Impakt ekonomik është i mundshëm
Intervistë e Presidentit të Dhomës Amerikane të Tregtisë Enio Jaço
Përhapja
me shpejtësi e koronavirusit në të gjithë botën do të ketë pasoja për ekonominë e globale, e për pasojë s'mund të jetë imune ekonomia shqiptare. Presidentit të Dhomës Amerikane të Tregtisë Enio Jaço në një intervistë për Zërin e Amerikës pohon se "një impakt ekonomik është i mundshëm. Është pak herët për të matur impaktin ekonomik që tani, por është e sigurtë që do ketë. Është e nevojshme gjithashtu që njerëzit në këtë moment të ndjekin këshillat e autoriteteve. Kjo është një situatë globale, dhe këshillat e autoriteteve janë të koordinuara me sistemin shëndetësor global. Është e rëndësishme që të mos futemi në panik, sepse na dëmton jo vetëm ekonomikisht, por edhe në aspekte të tjera. Por nuk është herët që të fillojmë të studiojmë një impuls ekonomik, se si të përballojmë situatën që do kemi nga koronavirusi". Ndërsa në lidhje me klimën e biznesit në vendin tonë Jaçe shprehet se ka një sërë problematikash. "Në Shqipëri, në Dhomën Amerikane të Tregtisë ne kemi AmCham Business Index. Është një anketë që bëhet me gjithë anëtarët e Dhomës, janë 220 kompani anëtare të Dhomës të cilët raportojnë problematikat që ndeshin në të bërit biznes në Shqipëri. Problemi numër 1 që ata raportojnë janë monopolet dhe konkurrenca e pandershme. Kjo ka lidhje të drejtpërdrejtë me korrupsionin. Problemi i korrupsionit është i përhapur, ne duhet ta shikojmë në sy dhe ta trajtojmë. Është momenti për të kuptuar nëse forcat politike apo forcat influenciale në Shqipëri, kanë arritur një moment që duan ta luftojnë korrupsionin apo jo. Unë mendoj që janë dy elemente kryesore shumë të rëndësishme. Së pari, kemi opinionin popullor, i cili është i tejngopur me klimën e përkeqësuar të korrupsionit, por, gjithashtu, kemi edhe komunitetin ndërkombëtar, i cili është ndërgjegjësuar shumë kohët e fundit dhe ka realizuar se pa luftuar korrupsionin në Shqipëri nuk mund të bëjmë dot progres politik të qëndrueshëm. Për herë të parë një Ambasadore Amerikane, ka vendosur në tre prioritet e saj kryesore përmirësimin e klimës së biznesit. Kemi, gjithashtu, një metodologji të re të Bashkimit Europian e cila ka vendosur ekonominë si një nga parimet kryesore te zgjerimit"- tha Jaçe. Presidenti i dhomës Amerikane ka komentuar edhe përfshirjen e vendit tonë në listën gri të pastrimit të parave. "Po është e vërtetë që dëmton besueshmërinë e Shqipërisë në sytë e investitoreve ndërkombëtarë. Diçka nuk ka shkuar mirë në lidhje me progresin që Shqipëria duhet të kishte bërë gjatë këtij viti. Janë dy gjëra shumë të rëndësishme. Është vullneti politik, që nuk mendoj se nuk ekziston, si dhe kapacitetet teknike që duhet të vendosen në dispozicion për përmirësimin e menjëhershëm të kësaj situate. Shpresoj qe vitin tjetër do të shohim një progres më të mirë"- deklaroi ai.