“Burg kush përhap me qëllim virusin”, Meta: Ndryshimet ishin të nevojshme
“Tenderët sekretë, të rritet përgjegjshmëria dhe transparenca”
Presidenti i Republikës, Ilir Meta, firmosi dje ndryshimet në Kodin Penal, një vendim i pritshëm, pasi mazhoranca miratoi çdo propozim të kreut të shtetit për masat kundër koronavirusit. Në një konferencë për mediat, Meta theksoi se kuadri ynë ligjor nuk ka parashikime për sëmundjet infektive dhe ky boshllëk duhej plotësuar. Meta i vlerësoi ndryshimet në Kodin Penal si të nevojshme në këtë kohë të fatkeqësisë natyrore. Në komunikimin drejtpërdrejt nga Presidenca, kreu i shtetit deklaroi se mbështet nismën e qeverisë për ndryshime në Kodin Penal, që parashikon dënime me burg për të gjithë ata që kryejnë me dashje veprime duke përhapur koronavirusin. “Ju përgjigja kërkesës së Kuvendit për ndryshimet në Kodin Penal, duke i dekretuar, pasi janë të nevojshme. Nisur nga zhvillimet, nga gjendja e fatkeqësisë, por mbi të gjitha për shkak të boshllëkut ligjor që ka Kodi Penal sa u takon veprimeve që kryhen me dashje, presidenti vlerëson se iniciativa e Kuvendit dhe qeverisë që mbrojtja e shëndetit të garantohet edhe nga norma penale duhet mbështetur. Presidenti konstaton se mes draftit të prezantuar fillimisht nga deputetët dhe përmbajtjes finale ka shumë ndryshime thelbësore pozitive, që kanë reflektuar një pjesë të sugjerimeve të shoqërisë civile, avokatit të popullit dhe presidentit”, tha Meta. Presidenti më tej u shpreh se tashmë ndryshimet në Kodin Penal janë në përputhje me ligjet dhe Kushtetutën dhe ruhet parimi i proporcionalitetit. Por, kryetari i shtetit vuri në dukje se para se të hyjnë në fuqi parashikimet për dënimin me burg të personave që përhapin me dashje infeksionin apo thyejnë karantinën, duhen marrë disa masa duke filluar nga nxjerrja e akteve nënligjore, tek informimi i qytetareve. “Njoftimi i menjëhershëm dhe i drejtpërdrejtë i personave të diagnostikuar, karantinuar apo izoluar dhe i të afërmve të tyre dhe personave të tyre të kontaktit duhet të jetë i dokumentuar”, - theksoi presidenti. Ilir Meta foli edhe për rastet e reja me koronavirus në fasoneri, por qasja e tij është ndryshe nga opozita, e cila flet për mbylljen e plotë të tyre. “Qeveria ka marrë disa masa, por duhet të marrë edhe më shumë për të plotësuar kushtet e karantinimit të tyre, kjo në varësi edhe të rrethanave gjeografike dhe fizike. Në këtë drejtim do të bëhet edhe më shumë. Kushtet që unë i kam verifikuar vetë në Konvaleshencë janë optimale. Se kush do të trajtohet atje, do të merret Ministria e Shëndetësisë. Sa u përket lajmeve të Krujës dhe Kurbinit, që janë shqetësuese, duhet të respektohen distancat sociale dhe kontrolle nga ISHP- ja për çdo lloj aktiviteti. Çdo lloj nënvlerësimi do të jetë një kosto e madhe për ekonominë dhe qytetarët. Duhet përqendrim më i madh për të parandaluar shpërthimin e vatrave të reja”, tha Meta. Edhe pse në dy muajt e fundit Ilir Meta ka mbështetur vendimet e qeverisë, presidenti shmangu vlerësimet për punën e kryeministrit. “Nuk ka ardhur akoma qershori, koha e provimeve”, - u shpreh z. Meta. Ai apeloi për kërkesën e opozitës për rritjen sa më shumë të numrit të testimeve.
Kreu i shtetit dekretoi dje ndryshimet e Kodit Penal, ku pjesa thelbësore e tyre ishin propozim i tiji. Ndryshimet parashikojnë deri në 8 vite burg për ata që përhapin sëmundje me vetëdije, ndërsa presidenti tha se parashikimi ligjor i situatave të tilla ishte i domosdoshëm. Ai nënvizoi se drafti final ka pasur një përmirësim të dukshëm pozitiv nga propozimi fillestar i qeverisë.