Covid- 19, PD propozon fillimin e hapjes: 5 hapat për daljen nga izolimi
Sugjerimet e ekspertëve të PD: Teste masive, maska falas dhe shtim të buxhetit “Hapja të implementohet e bazuar në një strategji”
Partia Demokratike i bëri dje thirrje qever isë që të adoptojë propozimet për planin e masave të domosdoshme që duhen të merren në rrugën drejt daljes nga izolimi, të cilat u bënë publike nga kryetari Basha nëpërmjet Planit me 5 pika. Nëpërmjet grupit të ekspertëve të shëndetësisë për Covid- 19, PD jep pesë hapa si masa të domosdoshme shëndetësore për fillimin e daljes nga izolimi. PD këmbëngul që të decentralizohet analizimi për virusin, duke theksuar se në Shqipëri gjenden edhe së paku 10 qendra të tjera që mund ta realizojnë këtë. “Në këto momente shumë të rëndësishme dhe po aq delikate kur po flitet për hapat drejt një procesi “hapjeje” të dëshiruar nga të gjithë, fatkeqësisht, nga ana e qeverisë vazhdon mungesa e një strategjie të qartë dhe plani masash transparente në ketë drejtim. Për këtë arsye i bëjmë thirrje qeverisë të marrë parasysh propozimin tonë për planin e masave të domosdoshme që duhen të merren në rrugën drejt daljes izolimi, të cilat u bënë publike nga kryetari Basha nëpërmjet Planit me 5 pika. Duke falënderuar
edhe një herë për mbështetjen SHBA dhe BE që edhe në përgjigje të thirrjeve të opozitës për ndihmë për të rritur testimet në vendin tonë, ne jemi shumë të shqetësuar që: testimet realizohen në vetëm në një laborator hermetik, pa asnjë mundësi për check tjetër dhe depistim të gjerë të popullsisë, kur në Shqipëri gjenden edhe së paku 10 qendra të tjera që mund ta realizojnë këtë”, - thuhet në reagimin e PD- së. Sipas ekspertëve të saj “vazhdon një konfuzion i plotë për testimet imunologjike, duke u tentuar që dhe kjo të realizohet vetëm në QSUT, kur kapacitetet për të tilla ekzaminime i kanë shumë laboratorë në vend.
Po ashtu, nuk ka asnjë transparencë se cila metodë laboratorike po përdoret: ELISA, Chemiluminisence apo Imunokromatografia. Mjeku i familjes vazhdon të jetë i pambrojtur e jashtë funksioneve të tij, gjë që ul kapacitetet identifikuese e mjekuese të sistemit shëndetësor”. “Prandaj, qëndrimi ynë është i qartë, “hapja” duhet të fillojë të implementohet, e bazuar në një plan dhe një strategji, e cila merr parasysh gjithë kapacitetet e vendit dhe është transparente dhe e kuptueshme për të gjithë. Të mos harrojmë që për këtë na duhet bashkëpunimi i të gjithë qytetarëve, sepse pa sakrificën dhe rolin e tyre nuk mund të zbatohet me sukses asnjë masë. Prandaj, sot është koha që qeveria të marrë propozimet e PD dhe t’i zbatojë ato, sepse ato janë në të mirën e qytetareve. Duhet pa humbur kohë të merren këto masa shëndetësore, të cilat janë të domosdoshme në periudhën që i paraprin hapjes: 1. Rritje të numrit të testimeve: test, test, test, identifikim, izolim e mjekim të çdo rasti. Kërkim të gjerë virusologjik e depistim imunologjik, duke mobilizuar të gjitha kapacitetet laboratorike, me rimbursim për qytetarët. Ndërkaq duhet përgatitur dhe për aplikimin e ekzaminimeve virusologjike mobile e të shpejta. 2. Pajisja masive gratis me maska të qytetareve, për të mundësuar mbajtjen e tyre në ambientet publike duke i paraprirë kështu “hapjes”. Aktivizimi i plotë i mjekut të familjes, duke siguruar më parë mbrojtjen, pajisjen profesionale e logjistike të tij me instruktim të qartë. 3. Konsolidimin e strukturave mjekuese në nivel vendi, për t’i bërë ballë një rishpërthimi të mundshëm të ri gjatë procesit të “hapjes”, ashtu si po veprohet në vendet e tjera, duke mos ngelur sërish të papërgatitur për të nesërmen. 4.
Nga ana organizative të kalohet në një proces decentralizimi, duke deleguar kompetenca ne nivelet e 12 qarqeve, që nga ana e tyre duhet t’i shpërndajnë më poshtë, për të shfrytëzuar kështu të gjitha kapacitetet dhe arritur të shkohet në çdo banesë e kontaktuar çdo individ. 5. Rritje e menjëhershme e buxhetit nga qeveria në mbështetje të këtyre masave të domosdoshme dhe shumë të vonuara”.