Hapet blloku i dytë i bizneseve, lista
Nis shërbimi taksi, DPSHTRR njofton rregullat për shoferët dhe pasagjerët Subjektet duhet të aplikojnë në ‘ e- Albania’ për të dokumentin
Nga dita e sotme do të hapet blloku i dytë i bizneseve nga ora 05: 00 deri në 17: 30. Subjektet mund të nisin punë vetëm pasi të kenë plotësuar dhe zbatuar protokolleve të miratuara, duke siguruar kushtet e detyrueshme higjiena sanitare dhe respektimin e distancimit fizik, për të garantuar sigurinë e qytetarëve dhe punonjësve. Bizneset që janë pjesë e kësaj liste të dytë duhet të aplikojnë në portalin e- albania dhe dokumenti i marrë, i cili shërben për të vërtetuar që është biznes i miratuar nga Ministria e Shëndetësisë, është i detyrueshëm që të afishohet në ambientet e biznesit në rast kontrolli. Vendimi për hapjen e këtyre subjekteve kthen në punë 27 mijë punonjës.
LISTA
Kategoritë e bizneseve që do të lejohen të ushtrojnë aktivitetin e tyre duke respektuar protokollet e miratuara që janë të publikuara në e- albania. Të hënën në datë 27 prill do të lejohen të ushtrojne aktivitetet nga ora 05: 00- 17: 30 bizneset si: dyqanet e veshjeve, të tekstileve, të këpucëve dhe artikujve prej lëkure, dyqanet që tregojnë mobilje, pajisje të ndriçimit dhe artikujve shtëpiakë, dyqanet e luleve, bimëve, të kafshëve të shtëpisë dhe ushqimit të tyre në dyqane të specializuara, shërbimi taxi, dyqanet e pajisjeve elektronike, lodrave për fëmijë, pajisjet sportive, pajisjet e telekomunikacionit.
TAKSITË
Drejtoria e Përgjithshme e Shërbimeve të Transportit Rrugor ka bërë me dije se duke filluar nga data 27 prill, do të rifillojnë shërbimet me taksi vetëm për lëvizjet brenda qytetit. Shoferë dhe pasagjerë duhet të respektojnë masat dhe protokollet e sigurisë të ndërmarra në situatën e emergjencës COVID- 19. Drejtoria e Përgjithshme e Shërbimeve të Transportit Rrugor njofton se shoferi dhe pasagjeri duhet të jenë të pajisur me maska, doreza dhe dezinfektant dhe se, gjithashtu, pasagjeri duhet të ulet mbrapa dhe diagonalisht me shoferin e mjetit. "Lejohet vetëm 1 klient në automjet. Përjashtim rastet nga e njëjta familje dhe të shoqërimit me të mitur apo persona me paaftësi! Kondicioneri duhet të jetë i fikur dhe ajrosja të jetë natyrale. Dritaret e mjetit të qëndrojnë pakëz hapur. Mbuloni gojën dhe hundën me një pecetë ose bërryl kur kolliteni apo kur teshtini. Shmangni prekjen e syve, hundës ose gojës me duar të palara. Pas pagesës me kartë/ cash, shoferi dhe pasagjeri duhet të dezinfektojnë duart. Pas çdo pasagjeri, shoferi të dezinfektojë: timonin, dorezat e dyerve të mjetit, sedilet, rripat e sigurimit, kontrollet e dritareve, butonin e bagazhit, etj."- thuhet në njoftim.