Kadastra jep tapitë për 1000 pronarë, dhe kompenson 300 të tjerë

Tokat e zëna nga ndërtimet pa leje, përfituesit e certifikatave të pronësisë Shpërndahet fondi, përfituesit në 12 qarqe

Agjencia e Kadastrës Shtetërore publikon listën me 1000 persona që kanë ndërtuar pa leje dhe do të marrin tapitë për truallin dhe 300 pronarë që do të marrin kompensimin për pronën e zënë nga ndërtimet informale. Përfituesit janë në të gjithë vendin. Agjencia Shtetërore e Kadastrës bën të ditur se përfituesit do të pajisen me certifikatën e pronësisë brenda afateve ligjore. Qeveria ka miratuar kalimin e së drejtës së pronësisë në favor të subjekteve përfituese për 1000 parcela ndërtimore të objekteve të legalizuara dhe kompensimin financiar të pronarëve të pasurive të paluajtshme që preken prej tyre, ku përfitojnë rreth 300 pronarë.

PËRFITUESIT

Përfituesit janë në qarqet Berat, Elbasan, Durrës, Tiranë, Shkodër, Vlorë,

Gjirokastër, Kukës dhe Korçë. Agjencia Shtetërore e Kadastrës do të regjistrojë sipërfaqet takuese dhe do të japë certifikatën e pronësisë. Sipërfaqja e parcelës për të cilën miratohet kalimi i së drejtës së pronësisë nuk mund të jetë më e madhe se trefishi i sipërfaqes së bazës së ndërtimit dhe për ndërtimet pa leje me funksion banimi jo më shumë se 500 m ² . Sipërfaqet mbi masat e përcaktuara në këtë pikë, të cilat për shkak të përmasave ose konfiguracionit nuk mund të shfrytëzohen më vete për ndërtim, i shiten poseduesit të ndërtimit pa leje sipas vlerës së pronës, të miratuar me vendim të Këshillit të Ministrave, vetëm nëse ka shprehur më parë vullnetin nëpërmjet një kërkese me shkrim. Pasi është miratuar kalimi i pronësisë për parcelat ndërtimore, është miratuar edhe kompensimi për pronarët. Këshilli i Ministrave ka miratuar edhe masën e kompensimit financiar për pronarët e pasurive të paluajtshme që preken nga ndërtimet e legalizuara.