Transfertat e dyshimta, u sekuestruan 9. 7 milionë euro
Drejtoria e Parandalimit të Pastrimit të Parave zbardh pesë mënyrat si u pastruan para Regjistrohen 1424 transaksione të dyshimta në 2019
Në adresë të Drejtorisë së Parandalimit të pastrimit të parave janë raportuar 1,424 transaksione të dyshimta gjatë vitit 2019. Sipas raportit zyrtar të këtij institucioni për vitin 2019, numri i raportimeve është 6.6% më i ulët nga një vit më parë. Drejtoria e Pastrimit të Parave e justifikon këtë rënie të raportimeve me argumentin se disa subjekte janë ndërgjegjësuar më tepër në drejtim të rritjes së cilësisë të denoncimeve të dërguara. Gjithashtu, ka shënuar rritje totali i aseteve të bllokuara nën dyshimin se janë prodhuar në rrugë kriminale. Në raport zbulohet se gjatë vitit 2019, janë nxjerrë në total 16 urdhra bllokimi të përkohshëm, kryesisht për llogari bankare, në një vlerë totale prej rreth 9,7 milionë euro, nga të cilat janë sekuestruar me vendim prokurori / gjykatë rreth 7,8 milionë euro. Drejtoria e Përgjithshme e Parandalimit të Pastrimit të Parave raportoi se në vitin 2019 janë vërejtur të paktën pesë tipologji të konsideruara me risk për pastrim parash dhe financim terrorizimi dhe të referuara në organet ligjzbatuese për hetime të mëtejshme.
PESË TIPOLOGJITË
Janë pesë tipologjitë që janë vërejtur dhe raportuar nga DPPPP. Në tipologjinë e parë janë transferta të kryera nga shtetas me precedentë penalë. "Shtetasi X, gjatë një periudhe 3- vjeçare ka dërguar një numër të konsiderueshëm transfertash në shtete të ndryshme, kryesisht në drejtim të shtetases Y- shtetase shqiptare, por dhe shtetasve Z - të huaj dhe shqiptarë, pa një lidhje të qartë mes tyre. Transfertat e kryera luhaten në kufijtë: 60 EUR - 6000 EUR; 15000 All - 110000 All dhe 100 USD - 200 USD. Nga verifikime të mëtejshme ka rezultuar se shtetasi X nuk ka aktivitet tregtar të regjistruar në vendin tonë, ndërsa shtetasja Y është sipërmarrëse: "ofron shërbime në fushën e pasurive të luajtshme/ paluajtshme?. Për shtetasin X u evidentua se është ish- punonjës i administratës shtetërore në rol drejtues dhe është arrestuar nga policia si person i lidhur me trafikun e lëndëve narkotike. Për sa më sipër, bazuar në numrin e lartë të transfertave brenda dhe jashtë vendit të kryera nga shtetasit e sipërcituar X dhe Y me shtetas të ndryshëm, lidhjet mes të cilëve janë të paqarta si dhe të dhënat për përfshirjen e shtetasit X në aktivitete të jashtëligjshme, rasti është dërguar për investigim të mëtejshëm në organet e zbatimit të ligjit"- thuhet në raport. Ndërsa në tipologjinë e dytë janë transferta të dyshimta, të dërguar nga një shtetas i vendit me risk. " Shtetasi shqiptar "X? 21 vjeç, rezulton të jetë ortak i vetëm dhe administrator në dy shoqëri të regjistruara: subjektin "D" Shpk themeluar në vitin 1998, me objekt "Tregtimin e të gjitha mallrave dhe kryesisht të duhanit" dhe subjektin "E" Shpk themeluar në vitin 2019, me objekt në fushën e ndërtimit dhe punime të infrastrukturës. Gjatë vitit 2019, ky shtetas ka përfituar në llogarinë personale në monedhën EUR, një transfertë ndërkombëtare nga një vend i Lindjes së Mesme "@?, në shumën 300000 EUR nga dërgues një shtetas i quajtur "Y" ( mosha 45 vjeç ) - shtetas i një vendi tjetër me risk të Lindjes së Mesme "?? dhe banues në shtetin nga ku është dërguar transferta. Qëllimi i deklaruar i transfertës është financimi i shoqërisë "E? shpk, bazuar në një kontratë huaje me afat 1- vjeçar, të nënshkruar një ditë më pas nga themelimi i kompanisë "E? shpk. Në kontratë është paraqitur se në rast moskthimi të huas brenda v. 2019, shtetasit "Y" i lind e drejta të përfitojë 49% të aksioneve të shoqërisë."thuhet në raport. Tipologjia e tretë është ajo e transfertave të dyshimta të përfituara nga kryerja e një aktiviteti ekonomik fiktiv. Në tipologjinë e katërt janë transferta të larta në mbërritje në favor të shoqërive Call Center, dhe në tipologjinë e pestë janë transfertë e dyshimtë në mbërritje nga një shtetas i një vendi me risk në Lindjen e Mesme. Merret një shembull që i referohet kësaj skeme. "Në mars të vitit 2019, pranë bankës "Z?, ka mbërritur një transfertë në vlerë 50000 Lek me përfitues shtetasen shqiptare "X". Transferta urdhërohet nga një shtetasi "A", me vendlindje në një shtet të lindjes së Mesme, dhe me vendqëndrim në një shtet të BE. Kjo transfertë urdhërohet nga një vend jo i BE. Pritësja e fondeve "X" shprehet se kjo shumë dërgohej me qëllim "ndihmesën në zhvillimin e një veprimtarie ekonomike në Shqipëri". Fondet e kaluar ishin në vlerë jo të lartë dhe kjo ngriti dyshime për qëllimin e transfertës, që mund të ishte testimi i sistemit për mbërritjen e fondeve në destinacion, ndërkohë që me në shumë të tillë nuk është e pritshme që të arrihet qëllimi i deklaruar. Nga verifikimet e kryera nga institucioni financiar, në të dhënat e World Check, rezultoni një përputhje e gjeneraliteteve të emrit dhe mbiemrit të shtetasit "A" dhe të vendlindjes së tij, si person i dyshuar për përfshirje në grupe militante/ terroriste. Duke marrë në konsideratë: Transfertën e dërguar nga një vend jo i Bashkimit Europian, nga një shtetas i një vendi me risk në Lindjen e Mesme dhe me vendqëndrim në një shtet të Bashkimit Europian; Përshkrimi i dyshimtë i transfertës në mbërritje në lidhje me qëllimin e dërgimit; mungesa e një lidhjeje midis palëve; Indicia për një përputhje me gjeneralitetet e dërguesit me një person të lakuar në për përfshirje në grupe militante/ terroriste; rasti është konsideruar i dyshimtë, për rrjedhojë është dërguar informacion për investigim të mëtejshëm në organet e zbatimit të ligjit brenda vendit si dhe është dërguar informacion spontan në vendin origjinues të transfertës"sqarohet në raportin e Drejtorisë së Parandalimit të pastrimit të parave.