Matura Shtetërore, Shahini: Rikthimi në shkollë, jo i detyrueshëm
"Do të informoheni përditë mbi testin nga QSHA"
Duke
nisur nga dita e sotme, kreu i QSHAsë, Rezana Vrapi do të japë informacione dhe detaje mbi testimin e maturantëve. Kjo është bërë me dije në komunikimin e radhës së ministres së Arsimit, Sportit e Rinisë, Besa Shahini, e cila ka adresuar një sërë pyetjesh të ardhura këto kohë nga maturantët. Për sa i përket përmbajtjes së provimit të sivjetshëm të maturës, duke filluar nga data 4 maj do të ketë komunikime të përditshme nga ana e Rezana Vrapi, drejtore e Qendrës së Shërbimeve Arsimore ( QSHA) mbi elemente dhe detaje të ndryshme të këtij provimi",tha Shahini. Ndërkohë, ajo më tej theksoi se "paralelisht, platforma akademi. al ka xhiruar pyetje dhe zgjidhje të detyrave për provimet kryesore në matematikë dhe shkenca, të cilat do t'i transmetojnë në RTSH. "Kështu që, jam e bindur që sivjet do të jeni më të përgatitur se kurrë më parë për të bërë provimin e maturës",shtoi ministrja e Arsimit.
RIKTHIMI NË SHKOLLË
Në video- mesazh, ministrja Shahini u ndal edhe në një element të rëndësishëm për sa i përket rikthimit në shkollë më 18 maj të maturantëve, duke sqaruar situatën për maturantët. Kthimi në shkollë nuk është i detyrueshëm. Ne po i hapim shkollat për maturantët ekskluzivisht për shkak se ju keni kërkuar që të keni konsultime me mësuesit tuaj përpara se të bëni provimin e maturës. Ndaj, nëse ndiheni që mund të bëni provimin e maturës pa e bërë këtë konsultim, ju mund të qëndroni në shtëpi gjatë kësaj kohe, të punoni individualisht, por duhet të njoftoni drejtorin e shkollës para 11 majit, në mënyrë që të planifikojmë uljen e nxënësve nëpër klasa dhe distancimin social për ata që shkojnë në shkollë",- tha Shahini në fjalën e saj. Ndërkohë, Shahini tha se mbrëmjet e maturës nuk do të lejohen pasi janë festa që nuk mundësojnë distancimin fizik mes nxënësve, kështu që sivjet ato duhet të anulohen dhe të gjenden forma të tjera për të festuar.