Kryeministri Rama ka një propozim për shpronësimin e pronarëve
Prezantohet plani i rindërtimit të Krujës pas dëmeve nga tërmeti
Plani
i rindërtimit të Bashkisë së Krujës është prezantuar dje. Gjatë një mbledhjeje "online", ministri i Rindërtimit Arben Ahmetaj, ministrja e Kulturës Elva Margariti dhe drejtori i Fondit Shqiptar të Zhvillimit Dritan Agolli kanë raportuar para kryeministrit Edi Rama, ku treguan detaje nga ky plan rindërtimi. Kreu i qeverisë ka bërë një ofertë për ata që humbasin një ndërtesë. "Ofertën e parë të këtyre që janë në të drejtën e tyre, subjekt i marrjes së një pagese për pronën. Duhet t'ua bëni për një shkëmbim në natyrë. Ata që do të humbasin një objekt apo hapësirë të caktuar, t'u propozohet që të marrim kompensimin nga ndërtimi një hapësirë të mirë dhe të favorshme. Edhe për të shmangur shpenzimet e tepërta për ata vetë, që të kenë mundësi që të fitojnë në pasuri të patundshme dinjitoze. Nëse nuk duan, ne do të procedojmë me procedurën ligjore të shpronësimit", - tha Rama.
Ndërkohë, ministrja Margariti bëri prezantimin e këtij plani, ndërsa theksoi se programi i rindërtimit në Krujë synon jo vetëm akomodimin ne? banesa te? reja të të gjithë dëmtuarve nga tërmeti, por edhe infrastrukturë të re dhe shërbime të shtuara e cilësore në të gjithë zonën. "Zona për rindërtim e Krujës është 1.5 ha. Zona e rindërtimit ka parë të nevojshëm edhe rigjenerim urban. Në situatën aktuale, ndërtesat që janë dëmtuar kanë qenë të vjetra. Ato kanë pasur dëmtime të mëdha. Brenda zonës së rindërtimit sipërfaqja për prishje është rreth 26 mijë metra katrorë. Janë 26 banesa kolektive dhe në zona të tjera ka 8 banesa. Kemi ndërmarrë dhe një planifikim për ndërtesat publike. Është menduar që pozicionimi i banesave të jetë rreth zonave të gjelbëruara", tha Margariti. Gjatë fjalës së tij, ministri Ahmetaj theksoi se i vetmi merak në këtë proces është shpronësimi i pronarëve që sipas tij, duhet të kenë parasysh edhe kryetarët e bashkive. "Këto çështje u evakuuan nga ministrja dhe drejtori. I vetmi merak që kemi nga ana procedurale është procesi i shpronësimit, që kryetarët, si në rastin e kryetarit të Bashkisë së Krujës, të përshpejtojmë pjesën e Thumanës, ashtu sikurse në Kurbin dhe në Laç. Të dyja VKM- të mendoj që të vijnë javën që vjen në qeveri dhe të nisë procesi i pagesës për të gjithë ata që janë të shpronësuar në bazë të ligjit", - tha Ahmetaj.